
काठमाडौं । नेपाल प्रिमियर लिग (एनपीएल) सहित विभिन्न राष्ट्रिय तथा अन्तर्राष्ट्रिय खेलकुद प्रतियोगितामा अनलाइन सट्टेबाजी गराएको आरोपमा दाङबाट पाँच जना पक्राउ परेका छन् । पक्राउ पर्नेमा एक नेपाली र चार भारतीय नागरिक रहेका छन् ।
लमही नगरपालिका–५, रातोडाँडास्थित जस्मिन होटेल एण्ड लजमा अनलाइन बेटिङ प्लेटफर्म सञ्चालन गरी सट्टेबाजीको कारोबार भइरहेको सूचनाका आधारमा प्रहरीले उनीहरूलाई पक्राउ गरेको हो ।
प्रहरीका अनुसार शुक्रबार साँझ करिब ७ः३० बजे होटेलको तेस्रो तलाका २०३ र २०४ नम्बर कोठा भाडामा लिएर विभिन्न अनलाइन बेटिङ प्लेटफर्ममार्फत सट्टेबाजीको कारोबार भइरहेको थियो । सूचनापछि लुम्बिनी प्रदेश प्रहरी कार्यालय दाङको टोलीले होटेलमा खानतलासी गर्दा सट्टेबाजीको कारोबार गरिरहेको अवस्थामा पाँचै जनालाई नियन्त्रणमा लिएको हो ।
प्रहरीले सट्टेबाजीमा प्रयोग गरिएका विभिन्न कम्पनीका दुई थान डेस्कटप कम्प्युटर, तीन थान ल्यापटप र १३ थान मोबाइल फोन गरी १८ थान विद्युतीय उपकरणसमेत बरामद गरेको छ ।
पक्राउ परेका पाँचै जनालाई बरामद विद्युतीय उपकरणसहित आवश्यक अनुसन्धान तथा कानुनी कारबाहीका लागि वडा प्रहरी कार्यालय लमहीमा राखिएको प्रहरीले जनाएको छ ।

























