सर्वोच्चले राेक्याे धनुषा-१ को परिणाम घाेषणा

काठमाडाैं । सर्वोच्च अदालतले धनुषा-१ को मतपरिणाम घोषणा तत्काल नगर्न आदेश जारी गरेकाे छ । धनुषा-१ मा राष्ट्रिय स्वतन्त्र पार्टीका उम्मेदवार किशोरी साह कमलको उम्मेदवारी मनोनयन निर्वाचन आयोगले खारेज गरेकाे थियाे । खारेज गरेकाे मतपत्रमा १३ हजार बढी मत आएकाे थियाे । आयाेगकाे निर्णय विरुद्धको रिटमा सुनुवाइ गर्दै साेमबार न्यायाधीश नृपध्वज निरौलाको एकल इजलासले तत्काल मतपरिणाम घाेषणा राेकेकाे हाे ।

‘अदालतबाट आदेश नहुँदासम्म त्यस निर्वाचन क्षेत्रको पहिलो हुने निर्वाचित हुने निर्वाचन प्रणालीतर्फको मत परिणाम घोषणा नगर्नु नगराउनू भनी सम्बन्धित निर्वाचन अधिकृतलाई जानकारी गराएकोबाट मतपरिणाम घोषणा स्थगन भइरहेकै भन्ने देखिएको र विषयवस्तुको संवेदनशीलता र गाम्भीर्यतालाई विचार गर्दा प्रस्तुत रिट निवेदनमा अन्तरिम आदेश जारी हुने नहुने सम्बन्धमा निर्वाचन आयोगको समेत कुरा सुनी निवेदकको उम्मेदवारी खारेज गर्ने गरी भएको निर्णयसमेत हेरी निष्कर्षमा पुग्नु उपयुक्त हुने देखिएबाट सो प्रयोजनार्थ २०८२ फागुन २९ गते प्राथमिकतामा पर्ने गरी पेसी तोकी सो छलफल पेसीमा विपक्षी आयोगको २०८२ फागुन १८ को निवेदकको उम्मेदवारी खारेज गर्ने सम्बन्धी निर्णयसहितको फाइल लिई आउनु भनी विपक्षीहरूलाई यथाशीघ्र जानकारी गराई नियमानुसार पेस गर्नु,’ आदेशमा भनिएको छ ।