विश्व रंगमञ्च दिवस मनाइँदै

काठमाडौं । विश्वभर विश्व रंगमञ्च दिवस आज (शुक्रबार) परेको छ । प्रत्येक वर्ष मार्च २७ तारिखमा पर्ने यो दिवस विभिन्न कार्यक्रमका मनाइँदै छ ।

नाटक तथा रंगमञ्च कलाको महत्वलाई उजागर गर्दै समाजमा सकारात्मक परिवर्तन ल्याउने उद्देश्यका साथ यो दिवस मनाउने गरिन्छ । सन् १९६१ मा अन्तर्राष्ट्रिय थिएटर संस्थान (आईटीआई)ले विश्व रंगमञ्च दिवसको अवधारणा अघि सारेको थियो भने सन् १९६२ देखि प्रत्येक वर्ष मार्च २७ लाई विश्व रंगमञ्च दिवसका रूपमा मनाउन थालिएको हो ।

पहिलो विश्व रंगमञ्च दिवसमा फ्रान्सका प्रसिद्ध नाटककार जीन कोक्टोले सन्देश दिएका थिए । यो दिवसले रंगमञ्चलाई मनोरञ्जनको माध्यम मात्रै नभई समाजका विकृति, विसंगति र असमानता उजागर गर्ने सशक्त कलात्मक माध्यमका रूपमा स्थापित गर्न सहयोग पुर्‍याउँदै आएको छ ।

साथै, सरकार, नीति निर्माता तथा सरोकारवालालाई थिएटर क्षेत्रको सांस्कृतिक तथा आर्थिक महत्वका बारेमा सचेत गराउने अवसरका रूपमा पनि यसलाई लिइन्छ । यस अभियानमा युनेस्कोले समेत निरन्तर सहयोग गर्दै आएको छ ।

नेपालमा पनि शुक्रबार विभिन्न कार्यक्रम गरी विश्व रंगमञ्च दिवस मनाइँदै छ । नेपाली समाजमा रंगमञ्चलाई जीवनका विविध पक्ष चित्रण गर्ने प्रभावकारी माध्यमका रूपमा लिइन्छ ।

पछिल्लो समय युवापुस्तामा नाटक तथा रंगमञ्चप्रतिको आकर्षण बढ्दै गएको भए पनि रंगकर्मीहरूको आर्थिक अवस्था भने अझै चुनौतीपूर्ण रहेको बताइन्छ । रंगमञ्चले समाज रूपान्तरणमा पुर्‍याउने योगदानलाई स्मरण गर्दै यो दिवस विश्वभर उत्साहका साथ मनाइँदै छ ।