ओली पक्राउको विषय एमालेले संसदमा उठाउने

काठमाडौं। नेकपा (एमाले) ले पार्टी अध्यक्ष केपी शर्मा ओली पक्राउको विषयलाई प्रतिनिधि सभाको बैठकमा सशक्त रूपमा उठाउने निर्णय गरेको छ ।

मंगलबार बसेको पार्टीको केन्द्रीय सचिवालय बैठकले चैत १९ गतेका लागि बोलाइएको सङ्घीय संसदको बैठकमा ओलीको गिरफ्तारीको विरोध गर्ने र उक्त मुद्दालाई प्रमुखताका साथ राख्ने निर्णय गरेको महासचिव शंकर पोखरेलले जानकारी दिए । एमालेले सरकारको यो कदमलाई राजनीतिक प्रतिशोध र पूर्वाग्रही ठहर गर्दै यसको सदन र सडक दुवैतर्फबाट प्रतिवाद गर्ने रणनीति तय गरेको छ ।

महासचिव पोखरेलका अनुसार एमालेले अध्यक्ष ओलीलाई गैरकानुनी ढङ्गले हिरासतमा लिइएको भन्दै सडक आन्दोलनका कार्यक्रमहरूलाई पनि निरन्तरता दिने भएको छ ।

बैठकले वर्तमान सरकारले प्रतिपक्षी नेताहरूलाई लक्षित गरी दमनकारी नीति अख्तियार गरेको निष्कर्ष निकाल्दै यसका विरुद्ध राजनीतिक रूपमा कडा प्रतिवाद गर्ने निर्णय गरेको हो । एमालेले आफ्ना कार्यकर्ता र शुभचिन्तकहरूलाई सरकारको स्वेच्छाचारी कदमविरुद्ध गोलबन्द हुन समेत आह्वान गरेको छ ।