न्याय परिषद्को निर्णय : न्यायाधीश सारु सैनिक विशेष अदालतको अध्यक्षमा सिफारिस

काठमाडौं । न्याय परिषद्ले सैनिक विशेष अदालतको अध्यक्ष पदमा उच्च अदालत पाटनका न्यायाधीश चन्द्र बहादुर सारुलाई तोक्न नेपाल सरकारलाई परामर्श दिने निर्णय गरेको छ। बुधबार बसेको परिषद्को बैठकले न्यायाधीश सारुलाई अदालतको कामकाजसमेत गर्ने गरी सो जिम्मेवारी दिन सिफारिस गरेको हो।

यस्तै, काठमाडौँ उपत्यका विकास प्राधिकरणको निर्णय उपर पुनरावेदन सुन्ने समितिको अध्यक्ष पदमा उच्च अदालत पाटनका अर्का न्यायाधीश टंकप्रसाद गुरुङलाई तोक्न सरकारलाई परामर्श दिने निर्णय गरिएको छ। परिषद्ले गुरुङलाई पनि हालको अदालतको कामकाजसमेत गर्ने गरी तोक्न सिफारिस गरेको हो।

बैठकले उच्च अदालत विराटनगरकी न्यायाधीश राज्यलक्ष्मी बज्राचार्यलाई अस्थायी इजलास ओखलढुंगामा काजमा खटाउन सिफारिस गर्ने निर्णय गरेको छ। त्यस्तै, काठमाडौँ जिल्ला अदालतका श्रेस्तेदार तीर्थराज भट्टराईलाई कैलाली जिल्ला अदालतको न्यायाधीशमा सिफारिस गरिएको छ।

परिषद्ले उच्च अदालत जनकपुरका न्यायाधीश श्यामकुमार भट्टराईलाई राष्ट्रिय न्यायिक प्रतिष्ठानमा काजमा खटाउन सिफारिस गर्ने निर्णय समेत गरेको छ।