नेतान्याहुद्वारा भ्रष्टाचार मुद्दाको बयान टार्ने प्रयास

जेरुसेलम । इजरायली प्रधानमन्त्री बेन्जामिन नेतान्याहुले आफ्नो विरुद्ध चलिरहेको भ्रष्टाचार मुद्दाको बयान दिन नसक्ने भन्दै अदालतमा निवेदन दिएका छन्। आगामी आइतबारदेखि सुरु हुने भनिएको सुनुवाइमा उपस्थित हुन नसक्ने जानकारी उनका वकिलले शुक्रबार जेरुसेलम जिल्ला अदालतलाई गराएका हुन्।

इरानसँगको युद्धपछि बुधबार मात्र युद्धविराम घोषणा भएको र देशको सुरक्षा अवस्था अझै संवेदनशील रहेको दाबी गर्दै उनले बयान सार्न माग गरेका छन्।

Advertisement

नेतान्याहुका वकिलले अदालतमा पेश गरेको पत्रमा भनिएको छ, ‘हालैका दिनमा इजरायल र पश्चिम एसियामा घटेका नाटकीय घटनाक्रम तथा अति गोप्य सुरक्षा र कूटनीतिक कारणले गर्दा प्रधानमन्त्री आगामी दुई हप्तासम्म बयान दिन असमर्थ छन्।’नेतान्याहुले ती गोप्य कारणहरू विस्तृत रूपमा लेखिएको एउटा खामबन्दी पत्र पनि अदालतलाई बुझाएका छन्। अब सरकारी वकिलको जवाफ आएपछि अदालतले यसबारे अन्तिम निर्णय गर्नेछ।

नेतान्याहु इजरायलको इतिहासमा पदमै रहेको बेला आपराधिक आरोप लाग्ने पहिलो प्रधानमन्त्री हुन्। उनीमाथि सन् २०१९ मा घुसखोरी, ठगी र विश्वासघातको आरोप लागेको थियो भने सन् २०२० बाट औपचारिक रूपमा मुद्दा सुरु भएको थियो।