कोपी शर्मा ओलीको शल्यक्रिया सुरु

काठमाडौं । पूर्वप्रधानमन्त्री एवं नेकपा (एकाले)का अध्यक्ष केपी शर्मा ओलीको पित्तथैलीमा देखिएको पत्थरी निकाल्न शल्यक्रिया सुरु गरिएको छ ।

ओलीको महाराजगञ्जस्थित त्रिवि शिक्षण अस्पताल मा सोमबार बिहान शल्यक्रिया थालिएको हो । अस्पतालका निर्देशक डा. सुवास आचार्यका अनुसार ओलीलाई बिहान अप्रेसन थिएटरमा लगिएको थियो । त्यसलगत्तै शल्यक्रिया प्रक्रिया सुरु गरिएको हो ।

Advertisement

‘शल्यक्रिया सम्पन्न भएपछि अस्पतालले आधिकारिक विवरण सार्वजनिक गर्नेछ,’ उनले भने । अस्पताल स्रोतका अनुसार शल्यक्रिया डा. पलेस्वाँ जोशी लाखेको नेतृत्वमा भइरहेको छ । चिकित्सकहरूको टोलीले ओलीको पित्तथैलीमा रहेको करिब २२ मिलिमिटरको पत्थरी निकाल्ने तयारी गरेको बताइएको छ । उक्त पत्थरीका कारण पछिल्लो समय उनलाई पेट दुख्ने तथा अन्य स्वास्थ्य समस्या देखिँदै आएको थियो ।

ओलीलाई यसअघि स्वास्थ्यमा समस्या देखिएपछि अस्पताल भर्ना गरिएको थियो । उनी चैत १३ गते भक्तपुरको गुण्डुस्थित आफ्नै निवासबाट पक्राउ परेपछि सोही दिन उपचारका लागि शिक्षण अस्पताल ल्याइएका थिए । त्यसयता चिकित्सकहरूको निगरानीमा उनको स्वास्थ्य परीक्षण र उपचार हुँदै आएको थियो ।

चिकित्सकहरूका अनुसार पित्तथैलीमा पत्थरी देखिएपछि शल्यक्रिया नै उपयुक्त विकल्प ठहर गरिएको थियो । सोही आधारमा आज शल्यक्रिया सुरु गरिएको हो । अस्पतालले शल्यक्रिया सम्पन्न भएपछि ओलीको स्वास्थ्य अवस्थाका बारेमा विस्तृत जानकारी सार्वजनिक गर्ने तयारी गरेको जनाएको छ ।

राजनीतिक रूपमा महत्वपूर्ण व्यक्तित्व रहेका ओलीको शल्यक्रियालाई लिएर राजनीतिक वृत्तमा पनि चासो देखिएको छ । अस्पताल स्रोतका अनुसार शल्यक्रिया सामान्य प्रक्रियाअनुसार भइरहेको छ । चिकित्सक टोलीले आवश्यक सबै सावधानी अपनाइएको जनाएको छ ।