आक्रमणमा ३५ जनाको मृत्यु

एजेन्सी । लेबनानमा पछिल्लो २४ घण्टामा भएका इजरायली आक्रमणहरूमा कम्तीमा ३५ जनाको मृत्यु भएको लेबनानी स्वास्थ्य मन्त्रालयले जनाएको छ ।

मन्त्रालयका अनुसार दक्षिणी तथा पूर्वी क्षेत्रहरूमा भएका आक्रमणहरूमा दर्जनौँ व्यक्ति घाइते भएका छन् । यो हताहती इजरायल र लेबनानबीच तनाव उच्च भएको र अन्तर्राष्ट्रिय स्तरमा वार्ता प्रयास भइरहेका समयमा भएको हो ।

Advertisement

इजरायलले इरान समर्थित हिजबुल्लाहका लक्ष्यहरूलाई केन्द्रित गर्दै करिब छ हप्तादेखि सैन्य कारबाही जारी राखेको बताइएको छ । पछिल्लो विवरणअनुसार मार्च २ यता भएका आक्रमणहरूमा लेबनानमा कम्तीमा २,१२४ जनाको मृत्यु भइसकेको छ । जसमा बालबालिका र स्वास्थ्यकर्मी ठूलो संख्यामा रहेका छन् ।

यसैबीच, इजरायली सेनाले दक्षिण लेबनानको बिन्त जबेल क्षेत्रमा आफ्ना केही सैनिक घाइते भएको पुष्टि गरेको छ । सो क्षेत्रमा हालै स्थल कारबाही तीव्र पारिएको जनाइएको छ । सेनाका अनुसार एक बटालियन कमाण्डरसहित तीन सैनिक गम्भीर घाइते भएका छन् ।

यता मानवीय संस्थाहरूले आक्रमणका कारण नागरिक क्षेत्रमा ठूलो क्षति पुगेको भन्दै चिन्ता व्यक्त गरेका छन् । डक्टर्स विदाउट बोर्डर्सले घना बस्ती र स्वास्थ्य संस्थामाथि भएको आक्रमणलाई गम्भीर मानवअधिकार उल्लंघन भन्दै तत्काल रोक्न आह्वान गरेको छ ।