
इनरुवा । सुनसरीको हरिनगर गाउँपालिका–४ भुटहा बजारबाट प्रहरीले ठूलो परिमाणमा बिल बिजकविहीन काँचो केरा बरामद गर्दै चार जनालाई पक्राउ गरेको छ ।
अवैध रूपमा ढुवानी भइरहेको केरासहित उनीहरूलाई शुक्रबार नियन्त्रणमा लिइएको जिल्ला प्रहरी कार्यालय सुनसरीले जनाएको छ । प्रहरीका अनुसार पक्राउ पर्नेमा मोरङ रतुवामाई नगरपालिका–८ का २२ वर्षीय प्रल्हाद दाहाल, मोरङ उर्लाबारी नगरपालिका–८ का २४ वर्षीय ज्ञानबहादुर भट्टराई, सुनसरी भोक्रा हानरसिंह गाउँपालिका–२ का २७ वर्षीय सेराज मियाँ र कोशी गाउँपालिका–८ भण्टाबारीका ६० वर्षीय रामेश्वर दास रहेका छन् ।
विशेष सूचनाका आधारमा खटिएको प्रहरी टोलीले घुस्कीबाट इनरुवातर्फ आउँदै गरेका प्र १–०२–००२ च ७४४९ र प्र १–०१–००२ च १८०१ नम्बरका दुईवटा पिकअप गाडीलाई शंका लागेर जाँच गरेको थियो । जाँचका क्रममा आवश्यक बिल बिजक कागजात नभएको ठूलो परिमाणको काँचो केरा फेला परेपछि चालकसहित चारै जनालाई नियन्त्रणमा लिइएको प्रहरीले जनाएको छ ।
प्रहरीले बरामद गरेको केराको अनुमानित मूल्य ११ लाख २० हजार रुपैयाँ रहेको जनाइएको छ । बरामद केरा र नियन्त्रणमा लिइएको सवारी साधन एवं पक्राउ परेका चारै जनालाई आवश्यक कारबाहीका लागि सुनसरी भन्सार कार्यालय, सेतुबन्ध कोशी ब्यारेज पठाइएको जानकारी प्रहरीले दिएको छ । प्रहरीको घटनाको थप अनुसन्धान पनि गरिरहेको छ ।



















