विश्वमा आर्थिक मन्दीको जोखिम बढ्यो

एजेन्सी । वाशिङ्टनस्थित अन्तर्राष्ट्रिय मुद्रा कोष (आईएमएफ)ले विश्व आर्थिक वृद्धि दर घट्ने चेतावनी दिएको छ । मध्यपूर्वमा जारी द्वन्द्वका कारण ऊर्जाको मूल्यवृद्धि र ढुवानी अवरोधले विश्व अर्थतन्त्र कमजोर हुँदै गएको कोषको विश्लेषण छ ।

आईएमएफको बैठकपछि सार्वजनिक गरिएको मूल्यांकन अनुसार द्वन्द्वको अवस्थाले तीन सम्भावित परिदृश्य प्रस्तुत गरेको छ । तुलनात्मक रूपमा सहज अवस्थामा द्वन्द्व छिट्टै अन्त्य हुने र २०२६ को दोस्रो भागपछि तेलको मूल्य सामान्य हुने अनुमान गरिएको छ ।

Advertisement

यस अवस्थामा तेलको औसत मूल्य करिब ८२ अमेरिकी डलर रहने र विश्व आर्थिक वृद्धि करिब ३ दशमलव ४ प्रतिशतमा सीमित रहने देखाइएको छ । तर, द्वन्द्व लामो समयसम्म जारी रहेमा तेलको मूल्य १०० डलरसम्म पुग्ने र विश्व वृद्धि दर २ दशमलव ५ प्रतिशतमा झर्ने अनुमान गरिएको छ ।

सबैभन्दा गम्भीर अवस्थामा भने तेलको मूल्य अझ बढ्दै आर्थिक वृद्धि २ प्रतिशतमा खुम्चिन सक्ने र विश्व मन्दीको जोखिम नजिकिने चेतावनी दिइएको छ । आईएमएफका प्रमुख अर्थशास्त्रीले ऊर्जा आपूर्तिमा देखिएको अनिश्चितताले पूर्वानुमानसमेत पुरानो हुन सक्ने संकेत गरेका छन् । यससँगै मुद्रास्फीति पनि बढेर ६ प्रतिशतभन्दा माथि पुग्ने जोखिम रहेको उल्लेख गरिएको छ ।

क्षेत्रगत रूपमा अमेरिका, युरोप र जापानको वृद्धि सुस्त रहने अनुमान छ भने चीनको वृद्धि पनि केही घट्ने देखिएको छ । विकासोन्मुख देशहरूमा भने असर अझ धेरै पर्ने बताइएको छ ।

यसबीच भारतको आर्थिक वृद्धि भने तुलनात्मक रूपमा मजबुत रहने प्रक्षेपण गरिएको छ । विश्वमा आर्थिक मन्दीको जोखिम बढेको भन्दै आईएमएफले सरकारहरूलाई इन्धन मूल्य नियन्त्रणका नाममा अनावश्यक हस्तक्षेप नगरी लक्षित र सीमित नीति अपनाउन सुझाव दिएको छ ।