इटहरीबाट खैरो हेरोइनसहित बाबु–छोरा पक्राउ

इटहरी । सुनसरीको इटहरी उपमहानगरपालिका–१८ रैहिपुरबाट प्रहरीले लागुऔषध ब्राउन सुगर (खैरो हेरोइन)सहित बाबु–छोरालाई पक्राउ गरेको छ ।

घरमै लागुऔषध कारोबार भइरहेको विशेष सूचनाका आधारमा कोशी प्रदेश प्रहरी कार्यालय विराटनगर र इलाका प्रहरी कार्यालय पकलीबाट खटिएको संयुक्त टोलीले ४८ वर्षीय शीतल चौधरीको घरमा मंगलबार साँझ ५ः२० बजेतिर छापा हानेको थियो । छापा हानेर घरका कोठा खानतलासी गर्दा ३ दशमलव ४८० मिलिग्राम ब्राउन सुगर बरामद भएको प्रहरीले जनाएको छ ।

Advertisement

प्रहरीले घटनास्थलबाट ब्राउन सुगरको कारोबारमा प्रयोग हुने डिजिटल तराजु, को २३ प ६४१८ र मे १ प ३९९५ नम्बरका दुईवटा मोटरसाइकल तथा नगद ८१ हजार ३४० रुपैयाँ र दुई थान मोबाइल बरामद गरेको छ । त्यसलगत्तै प्रहरीले ४८ वर्षीय शीतल र उनका छोरा २३ वर्षीय सुशान्त चौधरीलाई पक्राउ गरेको छ ।

बाबु–छोरा नै मिलेर घरबाट लागुऔषधको धन्दा चलाउने गरेको प्रारम्भिक अनुसन्धानबाट खुलेको छ । पक्राउ परेका दुवै जनालाई इलाका प्रहरी कार्यालय पकलीमा राखिएको छ । पक्राउ परेका बाबु–छोराविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।