ट्रम्पको दाबी, ‘इरान अमेरिकाको नियन्त्रणमै छ’

एजेन्सी । अमेरिकी राष्ट्रपति डोनाल्ड ट्रम्पले इरानसँगको युद्ध अन्त्य गर्न चीनको सहयोग आवश्यक नरहेको बताएका छन् ।

चिनियाँ राष्ट्रपति सी जिनपिङको निम्तालाई स्वीकार गर्दै चीन भ्रमणमा जाने क्रममा बेइजिङ प्रस्थान गर्नुअघि ट्रम्पले इरान पूर्ण रूपमा अमेरिकाको नियन्त्रणमा रहेको दाबी गरेका हुन् । सञ्चारकर्मीसँग कुरा गर्दै ट्रम्पले अमेरिकाले जुनसुकै अवस्थामा पनि युद्ध जित्ने दाबी गरे ।

Advertisement

उनले सुरुमा चीनसँग इरानका बारेमा विस्तृत छलफल हुने बताएका थिए । तर, केही समयमै आफ्नो भनाइ बदल्दै इरानको अवस्था नियन्त्रणमा रहेकाले यस विषयमा विशेष छलफल आवश्यक नभएको बताएका हुन् ।

ट्रम्पको तीन दिने चीन भ्रमणलाई अर्थपूर्ण रूपमा हेरिएको छ । भ्रमणका क्रममा व्यापार, ताइवान र इरानको आणविक कार्यक्रम मुख्य एजेन्डा बन्ने अपेक्षा गरिएको छ। अमेरिकाले चीनसँग खाद्यान्न र हवाईजहाज बिक्री बढाउने विषयमा पनि कुराकानी गर्ने जनाएको छ ।

यसैबीच ताइवानलाई अमेरिकाले ठूलो परिमाणमा हतियार बिक्री गर्ने तयारी गरेपछि बेइजिङ असन्तुष्ट बनेको छ । इरानसँगको शान्ति वार्ता भने पूर्ण रूपमा अवरुद्ध छ । अमेरिकाले इरानको आणविक कार्यक्रम अन्त्य गर्न दबाब दिइरहेको छ भने इरानले युद्ध क्षतिपूर्ति र युद्धविरामको सर्त अघि सारेको छ ।

अमेरिकी अधिकारीहरूले चीनलाई इरानमाथि प्रभाव प्रयोग गर्न आग्रह गरिरहेका बेला ट्रम्पले भने सार्वजनिक रूपमा चीनको सहयोग नचाहिने अडान दोहोर्‍याएका छन् ।