हमलामा परेर सुधार केन्द्रमै २६९ को मृत्यु

एजेन्सी । अफगानिस्तानको राजधानी काबुलस्थित लागुऔषध दुर्व्यसनी सुधार केन्द्रमा पाकिस्तानले गरेको आत्मघाती प्रकृतिको हवाई आक्रमणमा परी कम्तीमा २६९ जनाको मृत्यु भएको तथ्य सार्वजनिक गरिएको छ ।

संयुक्त राष्ट्रसंघले सार्वजनिक गरेको नयाँ प्रतिवेदनअनुसार मारिनेमा उपचाररत बिरामी र केन्द्रमा कार्यरत कर्मचारी रहेका छन् । गत मार्च १६ मा ‘ओमिद ड्रग रिह्याबिलिटेसन हस्पिटल’मा तीनवटा बम खसालिएको थियो ।

Advertisement

आक्रमण अत्यन्त शक्तिशाली भएकाले धेरै शव चिन्न नसकिने अवस्थामा पुगेका थिए । संयुक्त राष्ट्रसंघले पुष्टि गरेको मृतक संख्या २६९ भए पनि वास्तविक संख्या अझ बढी हुन सक्ने जनाइएको छ ।

पाकिस्तानी सेनाले उक्त केन्द्रलाई आतंकवादी र आत्मघाती बम आक्रमणकारीलाई तालिम दिने अखडाका रूपमा चित्रण गर्दै कारबाही गरिएको दाबी गरेको छ । तर, बीबीसीसँग कुरा गरेका ३० भन्दा बढी पीडित परिवार र प्रत्यक्षदर्शीले त्यहाँ सर्वसाधारण र उपचाररत बिरामी मात्रै रहेको बताएका छन् ।

मानवअधिकार संस्था ह्युमन राइट्स वाचले घटनालाई गैरकानुनी आक्रमण र सम्भावित युद्ध अपराध भनेको छ । संयुक्त राष्ट्रसंघले पनि उक्त स्थान सन् २०१६ देखि लागुऔषध सुधार केन्द्रका रूपमा सञ्चालन हुँदै आएको र अन्तर्राष्ट्रिय निकायहरूलाई त्यसबारे जानकारी रहेको स्पष्ट पारेको छ ।

सन् २०२१ मा तालिबान सत्तामा आएपछि पाकिस्तान–अफगानिस्तान सम्बन्ध लगातार तनावपूर्ण बन्दै गएको छ । पाकिस्तानले तालिबान सरकारले आफ्नो भूमिमा सक्रिय आतंकवादीलाई संरक्षण दिएको आरोप लगाउँदै आएको छ भने तालिबानले त्यसलाई अस्वीकार गर्दै आएको छ ।

तालिबान सरकारका प्रवक्ताले घटनालाई युद्ध अपराधको संज्ञा दिँदै अन्तर्राष्ट्रिय अनुसन्धान र दोषीमाथि कारबाहीको माग गरेका छन् । पीडित परिवारले भने आफ्ना आफन्तको सम्मानजनक अन्त्येष्टि गर्नसमेत नपाएको भन्दै न्यायको माग गरिरहेका छन् ।