हत्या आरोपीमाथि गोली प्रहार

काठमाडौं । काठमाडौंको चोभारमा हत्या आरोपितमाथि प्रहरीले गोली प्रहार गरेको छ । हत्याका आरोपी पक्राउ गर्ने क्रममा प्रहरीले गोली चलाएको हो ।

धारिलो हतियार प्रयोग गरी युवकको हत्या गरेको आरोपमा खोजीमा रहेका सुजन शाहीलाई नियन्त्रणमा लिन खोज्दा उनले प्रहरीमाथि नै आक्रमण गरी भाग्ने प्रयास गरेका थिए । काठमाडौं उपत्यका अपराध अनुसन्धान कार्यालयका अनुसार वैशाख २३ गते कीर्तिपुर नगरपालिका–१० पोडेटोलस्थित एक गार्डेनमा गुल्मी घर भएका २२ वर्षीय विपिन घिमिरेमाथि धारिलो हतियार प्रहार गरिएको थियो ।

Advertisement

गम्भीर घाइते भएका घिमिरेको उपचारका क्रममा मृत्यु भएको थियो । घटनापछि मुख्य आरोपी शाही फरार हुँदै काठमाडौंका विभिन्न स्थानमा लुकीछिपी बस्दै आएका थिए ।

प्रहरीले विशेष सूचनाका आधारमा उनको खोजी थालेको थियो । पक्राउ गर्न पुगेको प्रहरी टोलीमाथि शाहीले प्रतिकार गर्दै भाग्न खोजेपछि नियन्त्रणका लागि गोली प्रहार गरिएको काठमाडौं उपत्यका अपराध अनुसन्धान कार्यालयका प्रवक्ता एसपी रामेश्वर कार्कीले बताए ।

गोली लागेर घाइते भएका शाहीलाई उपचारका लागि अस्पताल लगिएको प्रहरीले जनाएको छ । प्रहरीले घटनाको थप अनुसन्धान अघि बढाएको छ ।