१ लाख ५० हजारसम्मका बचतकर्तालाई रकम फिर्ता

मुलुकी खबर

२०८३ जेष्ठ १३, बुधबार १८:५४

काठमाडौं । काठमाडौं महानगरपालिका, सहकारी विभागको रोहबरमा बुद्ध दर्शन सेभिङ एन्ड क्रेडिट कोअपरेटिभ लिमिटेडले बचतकर्ताको रकम फिर्ता गर्न सुरु गरेको छ । सहकारीले आज ३४ जना बचतकर्ताको बचत रकम फिर्ता गरेको जनाएको छ ।

काठमाडौं महानगरपालिका–६ मा सञ्चालित उक्त सहकारी संस्थाले एक लाख ५० हजारसम्म बचत गरेका ७० जना बचतदाता सदस्यलाई बचत रकम फिर्ता गरेको काठमाडौं महानगरपालिका सहकारी विभागले जानकारी दिएको हो । सहकारीले आगामी एक महिनाभित्र पाँच लाखसम्म बचत गरेका बचतकर्ताको रकमसमेत फिर्ता गर्ने योजना बनाएको जनाएको छ । विभागले बचत फिर्ता र ऋण असुली दुवै प्रक्रियामा सहजीकरण गर्दै आएको छ ।

सहकारी विभागका प्रमुख ध्रुवकुमार काफ्ले ले बचत रकम फिर्ता प्रक्रियाबारे जानकारी दिदै माग दाबी सहितको निवेदन लिएर संस्थाका सञ्चालक र बचतकर्ताबीच छलफल तथा मिलापत्र गराउने प्रयास भइरहेको बताए । उनका अनुसार संस्थाको सञ्चालक समितिको निर्णयअनुसार ऋणीलाई एसएमएस, रजिष्ट्री पत्र तथा सार्वजनिक सूचनामार्फत ऋण चुक्ता गर्न अनुरोध गरिन्छ ।

वडास्तरमा समस्या समाधान हुन नसके विभागले थप सहजीकरण गर्ने गरेको छ । यस क्रममा संस्थाका सञ्चालक सम्पर्कमा आउन नमाने कारबाहीका लागि सिफारिस गरिने तथा ऋणीले ऋण नतिरे सम्बन्धित निकायमा कारबाहीका लागि पठाइने व्यवस्था रहेको विभागले जनाएको छ। विभागका अनुसार यस प्रक्रियामार्फत बचतकर्ताले एकमुष्ट वा किस्ताबन्दीमा आफ्नो बचत रकम फिर्ता पाइरहेका छन् । संस्था बन्द गरी सम्पर्कविहीन भएकाको हकमा भने एसएमएस र पत्रमार्फत सूचना जारी गर्दै आवश्यक कारबाही प्रक्रिया अघि बढाइने गरिएको छ ।

तपाइको प्रतिक्रिया