आर्या न्युरो हस्पिटल पाँचौँ वर्षमा: सेवामा सहुलियत र गुणस्तरमा फड्को

विराटनगर । विराटनगर–३ कञ्चनबारीमा रहेको ‘आर्या न्युरो हस्पिटल’ ले आफ्नो स्थापनाको चार वर्ष पूरा गरी पाँचौँ वर्षमा प्रवेश गरेको छ । पाँचौँ वार्षिकोत्सवको अवसर पारेर हस्पिटलले बिरामीहरूको सेवाका लागि असार महिनाभरि विशेष सहुलियतका कार्यक्रमहरू सार्वजनिक गरेको छ ।

अस्पताल प्रशासनका अनुसार वार्षिकोत्सवको उपलक्ष्यमा असार महिनाभर ‘न्युरो ओपिडी’ सेवा पूर्ण रूपमा निःशुल्क गरिएको छ । त्यसैगरी, मधुमेहका बिरामीका लागि ब्लड सुगर (फास्टिङ र पीपी), पिसाब जाँच र रक्तचाप (ब्लड प्रेसर) जाँच पनि निःशुल्क उपलब्ध गराइने अस्पतालका निर्देशक दिनेश ठाकुरले जानकारी दिए ।

निर्देशक ठाकुरका अनुसार यी बाहेक अस्पतालमा गरिने अन्य सम्पूर्ण स्वास्थ्य जाँच तथा ल्याब परीक्षणहरूमा बिरामीले २५ प्रतिशत छुट पाउने छन् ।

विगत चार वर्षदेखि गुणस्तरीय स्वास्थ्य सेवा प्रदान गर्दै आएको यस अस्पतालले छोटो समयमै बिरामीहरूको ठुलो विश्वास जित्न सफल भएको छ । विशेषगरी न्युरो सम्बन्धी जटिल प्रकारका शल्यक्रिया र उपचार सेवामा आर्या न्युरो हस्पिटलले कोशी प्रदेशमै आफ्नो छुट्टै पहिचान बनाएको छ ।

अस्पतालमा वरिष्ठ न्युरो सर्जन डा. पंकजराज नेपालको नेतृत्वमा दक्ष चिकित्सक र स्वास्थ्यकर्मीको टोलीले अत्याधुनिक प्रविधिमार्फत उपचार सेवा प्रदान गर्दै आएको छ । वार्षिकोत्सवको अवसरमा प्रदान गरिएको यो सहुलियतले धेरै बिरामीलाई लाभ पुग्ने विश्वास अस्पतालले लिएको छ ।