सवारी ज्यान मुद्दाका फरार प्रतिवादी पक्राउ

सुनसरी । प्रहरीले सवारी ज्यान मुद्दामा अदालतबाट कैद तथा जरिबानाको सजाय सुनाइए पनि फरार रहेका एक प्रतिवादी सुनसरीबाट पक्राउ परेका छन् ।

इलाका प्रहरी कार्यालय महेन्द्रनगरबाट खटिएको टोलीले आइतबार साँझ ६ः३० बजेतिर सुनसरीको बराहक्षेत्र नगरपालिका–८, विष्णुचोकका २५ वर्षीय मदन मण्डललाई उनकै घरबाट पक्राउ गरेको हो । प्रहरीका अनुसार सुनसरी जिल्ला अदालतले २०७९ साल फागुन २६ गते मण्डललाई सवारी ज्यान मुद्दामा तीन वर्ष कैद र सात हजार रुपैयाँ जरिबानाको फैसला सुनाएको थियो ।

अदालतले दोषी ठहर गर्दै कैद र जरिबानाको फैसला गरेको भए पनि मण्डल लामो समयदेखि फरार थिए । पक्राउ परेका मण्डललाई आवश्यक कानुनी प्रक्रिया पूरा गरी फैसला कार्यान्वयनका लागि अदालतमा बुझाइएको प्रहरीले जनाएको छ ।

अदालतले कैद सजाय भुक्तानका लागि उनलाई कारागार चलान गरेको छ । अदालतको फैसला कार्यान्वयनलाई प्राथमिकतामा राखेर फरार प्रतिवादीहरूको खोजीका लागि अभियान सञ्चालन गरिएको सुनसरी प्रहरीका सूचना अधिकारी डीएसपी चन्द्रबहादुर खड्काले बताए ।