अजय सुमार्गीमाथिको सम्पत्ति शुद्धीकरण अनुसन्धानमा सर्वोच्चको अङ्कुश

काठमाडौं । व्यवसायी अजय सुमार्गी पराजुलीमाथि भइरहेको सम्पत्ति शुद्धीकरणको अनुसन्धान थप अघि नबढाउन सर्वोच्च अदालतले अन्तरिम आदेश जारी गरेको छ । न्यायाधीश बालकृष्ण ढकालको एकल इजलासले यस्तो आदेश दिएको हो ।

सुमार्गी आबद्ध दुई कम्पनी नेपाल स्याटेलाइट र मुक्तिश्री सिमेन्टसँग सम्बन्धित पुराना मुद्दाहरूको फैसलालाई आधार मान्दै सर्वोच्चले नयाँ अनुसन्धान तत्कालका लागि रोक्न भनेको हो ।

२०७६ सालमा सर्वोच्चले मुक्तिश्री सिमेन्टको वैदेशिक लगानीबारे ६ महिनाभित्र अनुसन्धान टुंग्याउन आदेश दिएको थियो, जुन अहिलेको अनुसन्धानसँग बाझिएको अदालतको ठहर छ ।

वर्षौंदेखि एउटै विषयमा पटक–पटक अनुसन्धान गरेर आफूलाई दुःख दिएको भन्दै सुमार्गी सर्वोच्च गएका थिए । विभागले दुई साताअघि उनको पासपोर्ट रोक्का गरेपछि उनी अदालत पुगेका हुन् ।

सुमार्गीले साइप्रस र ब्रिटिस भर्जिन आइल्याण्ड जस्ता ट्याक्स हेभन (कर छलीका लागि अनुकूल) मुलुकहरूबाट झण्डै १० अर्ब रुपैयाँ वैदेशिक ऋणका रूपमा भित्र्याउन खोजेका थिए । उक्त रकमको स्रोत नखुलेको र शंकास्पद देखिएको भन्दै राष्ट्र बैंक र सम्पत्ति शुद्धीकरण विभागले अनुसन्धान थालेको थियो ।

सर्वोच्चको यो आदेशसँगै विभागको अनुसन्धान तत्कालका लागि रोकिएको छ। यद्यपि, विभागले यो अन्तरिम आदेश खारेजीको माग गर्दै पुनः निवेदन दिने बाटो भने खुल्ला छ ।