एसियाली खेलकुदको तयारीका लागि नेपाली कुस्ती टोली भारत जाने

काठमाडौं । जापानमा आयोजना हुने २० औँ एसियाली खेलकुद (एसियाड) को विशेष तयारीका लागि नेपाली कुस्ती टोली बिहीबार भारत प्रस्थान गर्ने भएको छ। वैदेशिक प्रशिक्षणका लागि ६ खेलाडीसहितको टोली भारत जान लागेको हो ।

नेपाल कुस्ती संघका अनुसार प्रशिक्षण टोलीमा ४ पुरुष र २ महिला खेलाडी सहभागी छन् । पुरुषतर्फ सुरेश चुनारा (७४ केजी), रामकिशोर यादव (६५ केजी), निखिलराज पटेल (८६ केजी) र राज यादव (१२५ केजी) रहेका छन् । त्यस्तै, महिलातर्फ सुशीला चन्द (६२ केजी) र शिवांगी दुवे (५७ केजी) ले एसियाडमा नेपालको प्रतिनिधित्व गर्ने छन् ।

टोलीको मुख्य प्रशिक्षकमा राजेन्द्र चन्द रहेका छन् भने व्यवस्थापकका रूपमा खगेन्द्रबहादुर बस्नेत र मुम्ताज अली इद्रिसी भारत जान लागेका हुन् ।

नेपाल कुस्ती संघका अध्यक्ष प्रकाशकुमार कुसारीका अनुसार नेपाली टोलीले भारतमा करिब ४५ दिन प्रशिक्षण गर्ने छ । खेलाडीहरूले नयाँ दिल्ली र उत्तर प्रदेशको नन्दनीनगरस्थित विभिन्न प्रतिष्ठित एकेडेमीहरूमा प्रशिक्षण लिने तालिका रहेको छ ।

२० औँ एसियाली खेलकुद जापानको आइची–नागोयामा आगामी असोज ३ देखि १८ गतेसम्म सञ्चालन हुँदै छ। भारतमा आफ्नो प्रशिक्षण पूरा गरेपछि नेपाली टोली त्यहीँबाटै सिधै जापानतर्फ प्रस्थान गर्ने कार्यक्रम रहेको अध्यक्ष कुसारीले जानकारी दिए।

वैदेशिक प्रशिक्षणले खेलाडीहरूको मनोबल उच्च बनाउने र प्रदर्शनमा सुधार आउने विश्वास संघले लिएको छ।