ड्रोन आक्रमणमा नौ जनाको मृत्यु, गोदाम र तेल डिपोमा ठूलो क्षति

एजेन्सी । युक्रेनले रुसका विभिन्न क्षेत्रमा एकै रात व्यापक ड्रोन आक्रमण गर्दा कम्तीमा नौ जनाको मृत्यु भएको छ । ८० भन्दा बढी घाइते भएका छन् । आक्रमणका क्रममा रुसका दुई ठूला गोदाम, एक तेल डिपो तथा अन्य रणनीतिक संरचनामा क्षति पुगेको अन्तर्राष्ट्रिय सञ्चारमाध्यमहरूले जनाएका छन् ।

रुसी अधिकारीहरूका अनुसार सबैभन्दा ठूलो क्षति युक्रेनी सीमाबाट करिब ३६० किलोमिटर टाढा रहेको ताम्बोभ क्षेत्रको कोतोभस्क सहरस्थित गोदाममा भएको हो । रातिको सिफ्टमा कार्यरत सात कर्मचारीको घटनास्थलमै मृत्यु भएको छ भने २५ जना घाइते भएका छन् ।

Advertisement

मस्कोबाट करिब ५० किलोमिटर पूर्वमा रहेको एलेक्ट्रोस्टालस्थित अर्को ठूलो गोदाममा पनि ड्रोन प्रहार भएको छ । त्यससँगै नोगिन्स्क सहरको एक तेल डिपोमा आगलागी भएपछि नजिकैको प्रसूति अस्पताल र आवासीय भवन खाली गराइएको मस्को क्षेत्रका गभर्नर आन्द्रेई वोरोब्योभले बताएका छन् ।

उनका अनुसार मस्को क्षेत्रमा मात्रै ६१ जना घाइते भएका छन् । तीमध्ये २० जनाले बाह्यरोगी सेवा लिएका छन् भने ४० जना अस्पतालमा उपचाररत छन् । उपचारकै क्रममा एक जनाको मृत्यु भएको छ । शनिबार बेलगोरोड क्षेत्रमा भएको अर्को ड्रोन आक्रमणमा थप एक जनाको ज्यान गएको र एक जना घाइते भएको स्थानीय प्रशासनले जनाएको छ ।

आक्रमणका क्रममा ड्रोनको भग्नावशेष एक बालविकास केन्द्रमा खसेर आगलागी भए पनि आगो नियन्त्रणमा लिइएको बताइएको छ । मस्कोबाट करिब १८० किलोमिटर पूर्वमा रहेको भ्लादिमिर सहरको एक आवासीय भवनमा पनि ड्रोन ठोक्किँदा सामान्य आगलागी भएको भए पनि त्यहाँ मानवीय क्षति भएको छैन ।

रुसी अनलाइन खुद्रा कम्पनी वाइल्डबेरिजकी संस्थापक तात्याना किमले आफ्ना दुवै गोदाममा आगलागी भएको पुष्टि गर्दै कोतोभस्कस्थित आगो नियन्त्रणमा आइसकेको जानकारी दिएकी छन् । युक्रेनी राष्ट्रपति भोलोदिमिर जेलेन्स्कीले मस्को र ताम्बोभ क्षेत्रका दुई महत्त्वपूर्ण लजिस्टिक केन्द्रलाई सफलतापूर्वक निशाना बनाइएको बताएका छन् ।

उनका अनुसार ती केन्द्रहरू रुसले ड्रोन तथा नेभिगेसन उपकरण उत्पादनका लागि आवश्यक प्रतिबन्धित सामग्री आपूर्ति गर्न प्रयोग गर्दै आएको दाबी छ । उनले एक तेल प्रशोधन केन्द्रमा पनि आक्रमण गरिएको उल्लेख गरेका छन् ।

युक्रेनको जनरल स्टाफले नोगिन्स्कस्थित इन्धन डिपो रुसी सेनालाई इन्धन आपूर्ति गर्ने प्रमुख केन्द्र रहेको दाबी गर्दै ब्ल्याक सागर र आजोभ सागर क्षेत्रमा रहेका दुई ट्यांकर, दुई तैरिने क्रेन र एउटा टगबोटलाई समेत निशाना बनाइएको जनाएको छ । यता, रुसी रक्षा मन्त्रालयले आफ्नो हवाई रक्षा प्रणालीले रातभर १९ वटा क्षेत्र, रुसद्वारा गाभिएको क्रिमिया, आजोभ सागर र काला सागरको आकाशमा गरी ३७९ वटा युक्रेनी ड्रोन खसालिएको दाबी गरेको छ ।