२०८३ श्रावण २१, बिहीबार १०:५२
रौतहट । पूर्व–पश्चिम महेन्द्र राजमार्ग अन्तर्गत रौतहटको गुजरा नगरपालिका–३ स्थित धनसार पुल नजिकै पेट्रोल बोकेको ट्यांकर दुर्घटना हुँदा भीषण आगलागी भएको छ । शनिबार बिहान भएको उक्त दुर्घटनामा मानवीय क्षति भने हुन पाएन ।
बाराको अमलेखगन्जबाट १२ हजार लिटर पेट्रोल लोड गरी सर्लाहीतर्फ जाँदै गरेको मधेस प्रदेश ०३–००१ ख ७८११ नम्बरको ट्यांकर अनियन्त्रित भई सडकमा पल्टिएको थियो । ट्यांकर पल्टिए लगत्तै आगलागी सुरु भएको प्रहरीले जनाएको छ ।
प्रहरीका अनुसार ट्यांकरमा आगो सल्कनुअघि नै चालक समयमै बाहिर निस्कन सफल भएकाले उनी सकुशल रहेका छन् ।
घटना लगत्तै नेपाल प्रहरी, सशस्त्र प्रहरी र दमकलको टोली परिचालन गरी आगो नियन्त्रणमा लिइएको थियो । आगलागी र दुर्घटनाका कारण केही समय पूर्व–पश्चिम राजमार्गमा सवारी आवागमन पूर्ण रुपमा प्रभावित भएको थियो । अहिले आगो नियन्त्रणमा आइसकेको र राजमार्गमा यातायात सुचारु गर्ने प्रयास भइरहेको प्रहरीले जनाएको छ ।
प्रहरीले दुर्घटनाको कारणबारे थप अनुसन्धान भइरहेको बताएको छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी