बैंकिङ कसुरमा कोशी प्रदेश तेस्रो स्थानमा, १ हजार १५७ मुद्दा दर्ता

विराटनगर। नेपालमा पछिल्लो समय बैंकिङ कसुर तीव्र रूपमा बढ्दै जाँदा कोशी प्रदेश पनि यसबाट गम्भीर रूपमा प्रभावित भएको देखिएको छ।

नेपाल प्रहरीले सार्वजनिक गरेको तथ्याङ्कअनुसार देशभर दर्ता भएका बैंकिङ कसुरका मुद्दामध्ये कोशी प्रदेशमा १ हजार १५७ वटा मुद्दा दर्ता भएका छन्।

Advertisement

उपत्यकाबाहिरका प्रदेशहरूको तुलनामा कोशी प्रदेश बैंकिङ कसुर धेरै हुने सूचीको तेस्रो स्थानमा परेको छ। प्रदेशभर आर्थिक गतिविधि र बैंकिङ कारोबार बढेसँगै चेक अनादर (चेक बाउन्स), ठगी र वित्तीय अनियमितताका घटनाहरू वृद्धि भएको प्रहरीको विश्लेषण छ।

नेपाल प्रहरीका अनुसार देशभर कुल १२ हजार ९५० वटा बैंकिङ कसुरका मुद्दा दर्ता भएका छन्। जसमध्ये काठमाडौँ उपत्यकामा सबैभन्दा बढी ४६.५० प्रतिशत अर्थात् ६ हजार २२ वटा मुद्दा परेका छन्।

उपत्यकाबाहिर मधेश प्रदेशमा सबैभन्दा बढी १ हजार ७५७ र लुम्बिनी प्रदेशमा १ हजार २१८ वटा मुद्दा दर्ता भएका छन्। कोशी प्रदेशमा १ हजार १५७ मुद्दा दर्ता हुँदा बागमती प्रदेश (उपत्यका बाहेक) मा १ हजार २१, गण्डकीमा ९९४, सुदूरपश्चिममा ४२६ र कर्णाली प्रदेशमा सबैभन्दा कम ३५५ वटा मुद्दा दर्ता भएका छन्।