सामान किनेको बिलले बनाउन सक्छ लखपति: राजस्व विभागको उपहार योजना आजदेखि

काठमाडौं । आन्तरिक राजस्व विभागले करदाताहरूलाई प्रोत्साहन गर्ने उद्देश्यले आज (शुक्रबार) पहिलो पटक ‘करदाता प्रोत्साहन उपहार’ घोषणा गर्दै छ। साउन १ गतेदेखि १५ गतेसम्म वस्तु तथा सेवा खरिद गरेका उपभोक्ताहरूमध्येबाट गोला प्रथा मार्फत विजेता छनोट गरिने विभागले जनाएको छ।

बिहीबार विभागका प्राविधिकहरूले अर्थमन्त्री डा. स्वर्णिम वाग्लेलाई उपहार छनोटको प्राविधिक प्रणाली र विधि वारे जानकारी गराएका थिए । विभागका महानिर्देशक डा. भीष्मकुमार भुसालका अनुसार यो कार्यक्रमले उपभोक्तालाई अनिवार्य रूपमा बिल लिने बानी बसाल्न प्रेरित गर्नेछ ।

Advertisement

यस कार्यक्रम अन्तर्गत साउन १ देखि १५ गतेसम्मको कारोबारका आधारमा १५ जनाले जनही १ लाख रुपैयाँ (कर कट्टी गरेर) नगद पुरस्कार पाउने छन् । त्यस्तै, सोही अवधिमा खरिद गर्ने सम्पूर्ण उपभोक्ताहरूमध्येबाट एक जना भाग्यशाली विजेताले १० लाख रुपैयाँको  ‘बम्पर उपहार’ प्राप्त गर्नेछन् । १० लाखको पुरस्कारमा भने नियमानुसार कर लाग्ने विभागले जनाएको छ ।

बैंक वा वालेटको क्यूआरमार्फत भुक्तानी गर्ने उपभोक्ताहरू यस प्रक्रियामा स्वतः सहभागी हुनेछन् । तर, नगदमा कारोबार गर्नेहरूले भने अनिवार्य रूपमा प्यान वा भ्याट बिल मागेर त्यसलाई विभागको वेबसाइटमा प्रविष्ट गरी कुपन लिनुपर्नेछ । उपहार दाबी गर्नका लागि सक्कल बिल अनिवार्य रूपमा साथमा हुनुपर्नेछ ।

आगामी दिनमा हरेक महिनाको १६ गते र महिनाको अन्तिम दिन यसरी नै उपहार घोषणा गरिने कार्यविधि तयार पारिएको छ ।