दुई वर्षीया बालिकाको हत्या आरोपमा सौतेनी आमा पक्राउ

काठमाडौं । सप्तरीको शम्भुनाथ नगरपालिका–३ मा एक दुई वर्षीया बालिकाको हत्या गरेको आरोपमा प्रहरीले उनकी सौतेनी आमा (कान्छी आमा) लाई पक्राउ गरेको छ । शम्भुनाथ नगरपालिका–२ कन्कपट्टी टोल घर भई हाल वडा नम्बर ३ ट्राफिक बजारमा बस्दै आएकी २६ वर्षीया जास्मिन खातुन (मुस्कान) लाई पक्राउ गरेको प्रहरीले जनाएको छ ।

प्रहरीका अनुसार आइतबार बिहान करिब १०ः३५ बजेतिर बालिका घरबाटै हराएकी थिइन् । परिवार र स्थानीयले खोजी गर्ने क्रममा करिब दुई घण्टापछि घर पछाडिको झाडीमा बालिकाको शव फेला परेको थियो ।

Advertisement

मृतक बालिकाका बुबा मोहम्मद इरफानकी कान्छी पत्नी जास्मिनले नै बालिकाको हत्या गरेको प्रारम्भिक अनुसन्धानबाट खुलेको प्रहरीले जनाएको छ । मृतककी आमा रुबिना खातुनले दिएको जाहेरीका आधारमा प्रहरीले जास्मिनलाई नियन्त्रणमा लिएको थियो ।

पक्राउ परेकी जास्मिनले प्रारम्भिक सोधपुछका क्रममा आवेशमा आएर बालिकाको हत्या गरेको स्वीकार गरिसकेको प्रहरीले जनाएको छ । घटनाबारे थप अनुसन्धान अघि बढाइएको प्रहरीले जनाएको छ ।