२०८३ भाद्र १७, बुधबार १२:१३
काठमाडौं । बाराका एक बालकको अपहरणपछि भारत पुर्याएर हत्या गरिएको छ । प्रहरीका अनुसार विश्रामपुर गाउँपलिका–३ मुसहर्वाका ११ वर्षीय राजेशकुमार साहको भारतमा हत्या भएको हो ।
बारा प्रहरीका सूचना अधिकारी डीएसपी मीनबहादुर घलेका अनुसार बिहार मोतिहारी जिल्ला नुनियाडी पञ्चायत–१ स्थित सिंहा नदीमा मृत अवस्थामा बालकको शव फेला परेको हो । उनी भदौ ९ गते घरबाट एकाएक हराएका थिए ।
घलेका अनुसार खोजीको क्रममा ती बालकको शव नदीमा भेटिएपछि भारतीय प्रहरीको समन्वयमा अनुसन्धान सुरु गरिएको थियो । यस क्रममा अपहरणपछि हत्या आरोपमा विश्रामपुर–३ कै १७ वर्षीय किशोर पक्राउ परेका छन् ।
ती किशोरले विश्रामपुरस्थित घरबाटै अपहरण गरी भारतमा लगेर हत्या गरेको प्रारम्भिक अनुसन्धानले देखाएको घले बताउँछन् । ‘घटनापछिको अनुसन्धानमा ती किशोरले भारत लगेर हत्या गरेको देखिन्छ । हत्या गर्नुको कारण स्पष्ट खुलिसकेको छैन,’ उनले भने ।
किशोरविरुद्ध अपहरण तथा कर्तव्य ज्यान मुद्दा चलाउन अदालतबाट म्याद थप गरेर प्रहरीले अनुसन्धानको बाँकी प्रक्रिया अघि बढाएको छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
×