कोशीमा पानीको बहाव बढ्यो, तटीय क्षेत्रमा सतर्कता

विराटनगर । पूर्वी पहाडी जिल्लामा लगातार भइरहेको वर्षाका कारण सप्तकोशी नदीमा पानीको बहाव बढेको छ ।

आइतबार राति ८:१५ बजे गरिएको मापनअनुसार कोशी ब्यारेज भएर दुई लाख २० हजार क्युसेक पानीको बहाव थियो । ब्यारेज नियन्त्रण कक्षका अनुसार त्यसयता केही घटबढ भइरहेको छ । केही बेरअघि गरिएको मापनमा ब्यारेज भएर करिब १ लाख ९५ हजार पानीको बहाव छ ।

Advertisement

सुनसरीका प्रहरी नायव उपरीक्षक चन्द्रबहादुर खड्काका अनुसार पानीको बहाव बढेपछि कोशी ब्यारेजका ५२ वटा मूल ढोका र चारवटा नहरका गरी ५६ ढोकामध्ये २७ वटा खोलेर पानीलाई निकास दिइएको छ ।

बहाव बढेसँगै कोशी ब्यारेजमा सतर्कतासूचक रातो बत्ती बालिएको छ भने रातो झण्डासमेत फहराइएको छ ।

सप्तकोशीमा पानीको बहाव बढ्दै गएपछि कोशी नदी आसपासका बासिन्दालाई सतर्क रहन प्रहरीले आग्रह गरेको छ । नदीको पानीको सतह तथा बहावको अवस्थाबारे निरन्तर निगरानी भइरहेको जिल्ला प्रहरी कार्यालय सुनसरीले जनाएको छ ।

प्रहरीले कोशी नदी आसपासका जोखिमयुक्त क्षेत्रका बासिन्दालाई सावधानी अपनाउन आग्रह गरेको छ ।