चाडपर्व नजिकिँदै बजारमा चिनीको अभाव

काठमाडौं । चाडपर्व नजिकिँदै गर्दा बजारमा चिनीको अभाव देखिएको छ भने मूल्यसमेत अत्यधिक बढेको छ । खुला बजारमा चिनीको मूल्य प्रतिकिलो १५० देखि १६० रुपैयाँसम्म पुगेको छ । उपभोक्ताले महँगो मूल्य तिर्न तयार भए पनि सहज रूपमा चिनी नपाएको गुनासो गरेका छन् । तर सरकारी स्वामित्वका व्यापारिक कम्पनीहरूले भने पर्याप्त मात्रामा चिनी मौज्दात रहेको जनाएका छन् । चाडपर्वका समयमा चिनीको कृत्रिम अभाव र मूल्यवृद्धि हुन नदिन सरकारले आपूर्ति व्यवस्थापन तीव्र बनाएको जनाएको छ ।

उपभोक्तालाई सहुलियत दरमा चिनी उपलब्ध गराउन साल्ट ट्रेडिङ कर्पोरेसन र खाद्य व्यवस्था तथा व्यापार कम्पनी लिमिटेडले मौज्दात परिचालनसँगै नयाँ आयातको प्रक्रिया अघि बढाएका छन् । उद्योग, वाणिज्य तथा आपूर्ति मन्त्रालयले पनि बजारको माग र आपूर्तिको अवस्थाको सूक्ष्म विश्लेषण गरिरहेको जनाएको छ ।

Advertisement

सरकारी कम्पनीहरूले प्रतिकिलो १०५ देखि ११० रुपैयाँसम्ममा चिनी उपलब्ध गराउँदै आएका छन् । यसबाट चाडपर्वका बेला उपभोक्तालाई केही राहत पुग्ने अपेक्षा गरिएको छ । चाडपर्वलक्षित आपूर्ति व्यवस्थापनमा मुख्य भूमिका खेल्दै आएको साल्ट ट्रेडिङ कर्पोरेसनले बजारमा चिनीको अभाव हुन नदिने जनाएको छ । कर्पोरेसनका सूचना अधिकारी कुमार राजभण्डारीका अनुसार हाल संस्थासँग करिब ३२ देखि ३३ हजार बोरा चिनी मौज्दात छ ।

त्यसैगरी, निजी क्षेत्रका स्वदेशी चिनी उद्योगबाट खरिद गर्ने निर्णय भएको १२ हजार मेट्रिक टन अर्थात् करिब २ लाख ४० हजार बोरा चिनीको सम्पूर्ण भुक्तानीसमेत पठाइसकिएको छ । तर नागढुंगा–मुग्लिन सडकका विभिन्न खण्डमा देखिएको अवरोधका कारण ठूला सवारीसाधन सञ्चालन हुन नसक्दा उक्त चिनी साना ट्रकमार्फत क्रमशः काठमाडौं भित्रिरहेको राजभण्डारीले जानकारी दिए ।