संखुवासभामा धेरै भारी वर्षा

विराटनगर । संखुवासभामा पछिल्लो २४ घण्टामा धेरै भारी वर्षा भएको छ । जिल्लाको ‘टाशी गाउँ स्नो’ वर्षा मापन केन्द्रमा १६६ दशमलव ४ मिलिमिटर वर्षा मापन भएको मौसम पूर्वानुमान महाशाखाले जनाएको छ ।

महाशाखाका अनुसार संखुवासभासहित भक्तपुर, मकवानपुर, उदयपुर तथा दैलेख–जाजरकोटको सीमा क्षेत्रमा पनि भारीदेखि धेरै भारी वर्षा भएको छ । भक्तपुरको चाँगुनारायण स्टेशनमा १११ मिलिमिटर वर्षा मापन भएको छ । संखुवासभा र भक्तपुरमा मापन भएको वर्षालाई धेरै भारी वर्षाका रूपमा वर्गीकरण गरिएको छ ।

Advertisement

यस्तै, मकवानपुरमा ८४ दशमलव ४, उदयपुरमा ५९ र दैलेख–जाजरकोटको सीमा क्षेत्रमा पर्ने कट्टी स्टेशनमा ५६ मिलिमिटर वर्षा मापन भएको छ । यी स्थानमा भारी वर्षा भएको महाशाखाले जनाएको छ । भक्तपुरमा धेरै भारी वर्षापछि मनोहरा खोलामा बाढीसमेत आएको छ ।

मौसमविद्का अनुसार २४ घण्टामा १०० देखि २०० मिलिमिटरसम्म वर्षा हुनुलाई धेरै भारी वर्षा मानिन्छ । २०० मिलिमिटरभन्दा बढी वर्षा भए अति भारी वर्षा भनिन्छ । त्यस्तै, ५० देखि १०० मिलिमिटरसम्म भारी र १० देखि ५० मिलिमिटरसम्म मध्यम वर्षाका रूपमा वर्गीकरण गरिन्छ ।

महाशाखाले मंगलबार पनि देशभर मौसम बदली रहने र केही स्थानमा भारी वर्षा हुने पूर्वानुमान गरेको छ । वर्षाका कारण नदी तथा खोलानालामा पानीको बहाव बढ्न सक्ने भएकाले जोखिमयुक्त क्षेत्रका बासिन्दालाई सतर्क रहन आग्रह गरिएको छ ।