घुस प्रकरणमा सोलुखुम्बुको सोताङ गाउँपालिकाकी उपाध्यक्ष र उनका छोराविरुद्ध आरोपपत्र

काठमाडौं । सोलुखुम्बुको सोताङ गाउँपालिकाकी उपाध्यक्ष अन्जु नाछिरिङ राई र उनका छोरा सुनिल नाछिरिङ राईविरुद्ध अख्तियार दुरुपयोग अनुसन्धान आयोगले विशेष अदालत, काठमाडौंमा आरोपपत्र दायर गरेको छ ।

गाउँपालिकामा आर्थिक वर्ष २०८०/८१ मा सञ्चालित ९० कार्यदिनको ढाका सिलाइ–बुनाइ तालिममा प्रशिक्षकको काम दिलाइदिने भन्दै उपाध्यक्ष राईले ४५ हजार रुपैयाँ घुस मागेको अख्तियारले जनाएको छ । उक्त रकम उनले आफ्ना छोरा सुनिलको बैंक खाताको क्यूआर कोडमार्फत हाल्न लगाएको अनुसन्धानबाट पुष्टि भएको अख्तियारको दाबी छ ।

Advertisement

अख्तियारका अनुसार पदीय जिम्मेवारीको दुरुपयोग गर्दै उपाध्यक्ष राईले छोरा सुनिलसँगको मिलेमतोमा सेवाग्राहीबाट ४५ हजार रुपैयाँ रिसवत लिएको पाइएको छ । उक्त कार्य भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर भएको भन्दै अख्तियारले उपाध्यक्ष राईलाई सोही दफाको उपदफा (१) को देहाय (क) अनुसार कैद तथा बिगोबमोजिम जरिवाना सजायको मागदाबी गरेको छ ।

त्यस्तै, सुनिल नाछिरिङ राईले पनि उपाध्यक्ष राईसँग मिलेमतो गरी सेवाग्राहीबाट ४५ हजार रुपैयाँ घुस लिई प्रयोग गरेको अख्तियारले जनाएको छ। उनको हकमा भ्रष्टाचार निवारण ऐन, २०५९ को दफा ३ को उपदफा (२) बमोजिमको कसुर ठहर गर्दै सोही ऐनको दफा ३ को उपदफा (१) को देहाय (क) अनुसार कैद तथा बिगोबमोजिम जरिवाना सजायको मागदाबी गरिएको छ ।

आयोगका प्रवक्ता सुरेश न्यौपानेले उपाध्यक्ष राई र उनका छोरा सुनिलविरुद्ध मागदाबीबमोजिम सजायको माग गर्दै विशेष अदालतमा आरोपपत्र दायर गरिएको जानकारी दिए ।