ज्यान मार्ने उद्योगका फरार प्रतिवादी १ हजार ४५४ किलो गाँजासहित पक्राउ

विराटनगर । ज्यान मार्ने उद्योग मुद्दामा फरार रहेका एक व्यक्ति सुनसरीमा १ हजार ४५४ किलोभन्दा बढी गाँजासहित पक्राउ परेका छन् ।

प्रहरीले इनरुवा नगरपालिका–१० जाल्पापुर चम्राही टोलबाट भोक्राहा नरसिंह गाउँपालिका–५ का ३० वर्षीय रामबहादुर यादवलाई आज (शनिबार) बिहान करिब ३ बजे पक्राउ गरेको हो ।

Advertisement

जिल्ला प्रहरी कार्यालय सुनसरीबाट खटिएको टोलीले विशेष सूचनाका आधारमा को १ च ८२७९ नम्बरको टाटा पिकअपमा गाँजा लोड गर्दै गरेको अवस्थामा यादवलाई पक्राउ गरेको हाे । प्रहरीले उनको साथबाट ४७ पोका गाँजा बरामद गरेको थियो ।

कोशी प्रदेश प्रहरी प्रवक्ता एसएसपी योगेन्द्रसिंह थापाका अनुसार बरामद गाँजाको तौल १ हजार ४५४ किलो ८७० ग्राम रहेको छ ।

प्रहरीका अनुसार यादवविरुद्ध ज्यान मार्ने उद्योग मुद्दामा पक्राउ पुर्जी जारी भएको थियो । मुद्दामा फरार रहेका उनी गाँजाको अवैध कारोबारमा संलग्न रहेको अवस्थामा पक्राउ परेका हुन् ।

गाँजा र पिकअपसहित पक्राउ परेका यादवलाई जिल्ला प्रहरी कार्यालय सुनसरीमा राखेर थप अनुसन्धान भइरहेको एसएसपी थापाले बताए ।

प्रहरीका अनुसार गाँजा बरामद भएको स्थान जिल्ला प्रहरी कार्यालय सुनसरीबाट करिब ९ किलोमिटर दक्षिणमा पर्छ ।