अमेरिकाको थप ३१ मिलियन सहयोग

काठमाडौं । बाढीबाट प्रभावित नेपालका विभिन्न स्थानमा पुनर्स्थापना र पुनर्निर्माणका लागि अमेरिकाले थप ३१ मिलियन अमेरिकी डलर सहयोग गर्ने घोषणा गरेको छ ।

न्यूयोर्कमा नेपालका परराष्ट्रमन्त्री शिशिर खनालसँग भएको भेटमा अमेरिकी विदेश मन्त्रालयकी राजनीतिक मामिलासम्बन्धी उपसचिव एलिसन हुकरले सहयोगको घोषणा गरेकी हुन् । भेटका क्रममा उनले बाढीबाट प्रभावित नेपाली नागरिकप्रति समवेदना व्यक्त गर्दै अझै सम्पर्कविहीन करिब ७० जना अमेरिकी नागरिकका परिवारप्रति पनि दुःख व्यक्त गरिन् ।

Advertisement

अमेरिकी सहयोगअन्तर्गत यातायात पूर्वाधार पुनःस्थापना र क्षेत्रीय सम्पर्क विस्तारका लागि १० मिलियन डलर बराबरका स्थायी तथा आवश्यकताअनुसार निर्माण गर्न मिल्ने पुल उपलब्ध गराइनेछ । ती पुल अमेरिकी कम्पनीबाट खरिद गरिने जनाइएको छ ।

त्यस्तै, प्रभावित समुदायलाई खानेपानी, सरसफाइ, आश्रय, संरक्षण, जीविकोपार्जन तथा हिउँदका आवश्यकताका लागि थप ८ मिलियन डलर खर्च गरिनेछ । बाढीपछिको विपद् व्यवस्थापन र प्रतिकार्य क्षमता बढाउन अमेरिकामा निर्मित ड्रोन उपलब्ध गराउन १३ मिलियन डलर खर्च गर्ने योजना पनि सार्वजनिक गरिएको छ ।

नयाँ घोषणासँगै नेपालको बाढी प्रतिकार्य तथा पुनःस्थापनामा अमेरिकाले गर्ने कुल सहयोग ३६ मिलियन डलरभन्दा बढी पुगेको अमेरिकी दूतावासले जनाएको छ । अमेरिकाले नेपाल सरकारसँग समन्वय गरी आवश्यकता पहिचानका आधारमा थप सहयोग गर्ने प्रतिबद्धता पनि जनाएको छ ।