सीमा अपराध नियन्त्रणमा कडाइ गर्न सशस्त्र प्रहरी महानिरीक्षकको निर्देशन

महोत्तरी । सशस्त्र प्रहरी महानिरीक्षक नारायणदत्त पौडेलले सीमा क्षेत्रमा हुने अपराध तथा अवैध गतिविधि नियन्त्रणमा कडाइका साथ प्रस्तुत हुन मातहतका सुरक्षाकर्मीलाई निर्देशन दिएका छन् ।

मधेस प्रदेशस्थित नं. २ छिन्नमस्ता वाहिनी मुख्यालय महोत्तरी तथा मातहतका गण, गुल्म, बोर्डर आउट पोस्ट (बीओपी) र सुरक्षा बेसमा कार्यरत सशस्त्र प्रहरी कर्मचारीलाई उनले यस्तो निर्देशन दिएका हुन् ।

महानिरीक्षक पौडेलले सीमा सुरक्षा र समसामयिक विषयमा सम्बन्धित सरोकारवाला निकाय तथा सीमावर्ती स्थानीय बासिन्दासँग छलफल गर्दै भइरहेका कामकारबाहीबारे जानकारी लिएका थिए । सो क्रममा उनले सीमा क्षेत्रमा हुने अवैध गतिविधिको प्रभावकारी निगरानी, नियन्त्रण तथा रोकथामलाई थप सुदृढ गर्न निर्देशन दिए ।

उनले उच्च सतर्कता, आपसी समन्वय र जिम्मेवारीका साथ कार्यसम्पादन गर्दै सीमा क्षेत्रमा हुने अवैध क्रियाकलाप नियन्त्रणका लागि समयमै आवश्यक योजना बनाउन कमान्डरहरूलाई निर्देशन दिए ।

महानिरीक्षक पौडेलले सीमा अपराधसँगै राजस्व चुहावट नियन्त्रणमा समेत प्रभावकारी रूपमा परिचालित भई नतिजामुखी काम गर्नुपर्नेमा जोड दिएका छन् ।

सशस्त्र प्रहरीका सहप्रवक्ता शैलेन्द्र थापाका अनुसार महानिरीक्षक पौडेलले सीमा सुरक्षालाई थप प्रभावकारी बनाउन स्थानीय बासिन्दा तथा सरोकारवाला निकायसँग निरन्तर समन्वय र सहकार्य गर्नसमेत निर्देशन दिएका छन् ।