बेलायतको नेपाली च्यारिटी फाउन्डेसनद्वारा बाढीपीडितलाई एक करोड

काठमाडौं । बेलायतस्थित च्यारिटी कमिसनमा दर्ता भएको ‘द लामिछाने फाउन्डेसन’ले भोटेकोशी बाढीपीडितका लागि एक करोड सात लाख रुपैयाँ सहयोग गरेको छ ।

फाउन्डेसनले लन्डनस्थित नेपाली दूतावासमार्फत ५१ हजार ७ सय २७ पाउन्ड बाढीपीडितका लागि प्रदान गरेको हो । दूतावासमा आयोजित कार्यक्रममा फाउन्डेसनका अध्यक्ष तथा लन्डनस्थित फेसन उद्यमी रविन्द्रजंग लामिछानेले कार्यवाहक राजदूत विपिन दुवाडी र राष्ट्रिय स्वतन्त्र पार्टीकी सांसद विदुषी राणालाई सहयोग रकमको चेक हस्तान्तरण गरे ।

फाउन्डेसनले प्रदान गरेको रकम दूतावासले प्रधानमन्त्री दैवी प्रकोप उद्धार कोषमा पठाउने कार्यवाहक राजदूत दुवाडीले जानकारी दिए ।

कार्यक्रममा सांसद राणाले फाउन्डेसन तथा व्यवसायी लामिछानेलाई धन्यवाद दिइन् । उनले बेलायत भ्रमणका क्रममा बाढीपछिको पुनर्निर्माणमा नेपाललाई सहयोग गर्न ब्रिटिस राजनीतिज्ञहरूसँग भेटेर सहयोगका लागि आग्रह गरेको जानकारी दिइन् ।

त्यस्तै, करिब पाँच दशकदेखि बेलायतमा सक्रिय राजनीतिमा रहेका पूर्वसांसद वीरेन्द्र शर्माले व्यवसायी लामिछानेले बेलायत र नेपालको सम्बन्ध अभिवृद्धिमा उल्लेख्य योगदान गरेको भन्दै प्रशंसा गरे ।

फाउन्डेसनका अध्यक्ष लामिछानेले आफ्नो देशमा विपद् आइपर्दा सहयोग गर्नु आफ्नो दायित्व भएको बताए। उनले फाउन्डेसनलाई सहयोग गर्ने सम्पूर्ण दातालाई धन्यवाद दिए ।

कार्यक्रममा ब्रिटिस सेनामा लेफ्टिनेन्ट कर्णेलबाट अवकाशप्राप्त पूर्वगोर्खा टोल खाम्चा मगर तथा नेपाली समुदायका अग्रज व्यवसायी महन्त श्रेष्ठ ‘ओबीई’लगायतले लामिछाने फाउन्डेसनको कामको प्रशंसा गरे । फाउन्डेसनका बोर्ड अफ ट्रस्टीद्वय लक्ष्मी राई र सूर्यप्रसाद उपाध्यायले संस्था स्थापनाको उद्देश्य र भावी कार्यक्रमबारे जानकारी गराएका थिए ।