एमालेमा सार्वजनिक असहमति रोक्ने ओलीको कडा सन्देश, नेतृत्व हस्तान्तरणमा भने ‘हतार नगर्न’ जोड

काठमाडौं । नेकपा (एमाले)ले पार्टीको नीति, निर्णय र नेतृत्वमाथि सार्वजनिक रूपमा प्रश्न उठाउने वा विरोध गर्ने नेता कार्यकर्तामाथि अनुशासनको कारबाही गर्ने नीति अघि सारेको छ ।

अध्यक्ष केपी शर्मा ओलीले हस्ताक्षर गरी असोज १८ गते जारी गरेको अन्तरपार्टी निर्देशन (अपानि)मार्फत यस्तो स्पष्ट सन्देश पार्टी पंक्तिमा पठाइएको हो । असोज ८ गते सम्पन्न तेस्रो केन्द्रीय कमिटी बैठकका निर्णय समेटिएको अपानिमा सार्वजनिक आलोचना, विरोध, निन्दा वा अपमान गर्ने, गुटबन्दी गर्ने तथा अराजक र अनुशासनहीन गतिविधिमा संलग्न हुनेलाई स्पष्टीकरण सोधेर कारबाही गर्न पार्टी कमिटीलाई निर्देशन दिइएको छ ।

एमालेले पछिल्लो समय पार्टीभित्र देखिएको स्वेच्छाचारिता, अराजकता र अनुशासनहीनता अन्त्य गरी एकताबद्ध संगठन निर्माणका लागि यस्तो व्यवस्था आवश्यक भएको जनाएको छ । ओलीले यसअघि भएका अभिव्यक्ति र गतिविधिलाई भने माफी दिने संकेत गर्दै तेस्रो केन्द्रीय कमिटी बैठकलाई ‘कटअफ बैठक’ का रूपमा लिन निर्देशन दिएका छन् ।

पार्टी पुनर्गठनको बहस चलिरहेका बेला ओलीकै नेतृत्वका कारण एमाले कमजोर बनेको र निर्वाचनमा समेत पराजय बेहोर्नुपरेको भन्दै केही नेता कार्यकर्ताले सार्वजनिक अभिव्यक्ति दिँदै आएका थिए । उपाध्यक्ष रामबहादुर थापा ‘बादल’ नेतृत्वको पुनर्गठन कार्यदलले सातै प्रदेशमा गरेको छलफलपछि तयार पारेको प्रतिवेदनमा समेत ओलीलाई नेतृत्वबाट हटाउनुपर्ने सुझाव समेटिएको थियो ।

यसैबीच, एमालेले नेतृत्व पुस्तान्तरणलाई पनि प्रणालीगत प्रक्रियाका रूपमा अघि बढाउने दाबी गरेको छ । युवा नेतृत्वलाई केवल कोटामा सीमित नगरी जिम्मेवारी, प्रशिक्षण, नीति निर्माण, संगठन सञ्चालन र निर्वाचनमा परीक्षणमार्फत विकास गर्नुपर्ने उसको भनाइ छ । महिला नेतृत्वलाई पनि औपचारिक प्रतिनिधित्वमा सीमित नराखी कठिन जिम्मेवारी दिनुपर्नेमा जोड दिइएको छ ।

एमालेले पूर्वराष्ट्रपति विद्यादेवी भण्डारीलाई अध्यक्षपछिको वरीयतासहित वरिष्ठ नेता बनाउने निर्णय गर्दै सक्रिय राजनीतिमा फर्कने बाटो खोलेको छ । ओलीले नेतृत्व हस्तान्तरण अपरिहार्य भए पनि हतार, दबाब वा अपमानबाट नभई विधिसम्मत प्रक्रियाबाट हुनुपर्ने बताएका छन् । ‘नेतृत्व कुनै व्यक्तिको निजी सम्पत्ति होइन’ भन्दै उनले आजको नेतृत्वले नै भोलिको नेतृत्व तयार गर्नुपर्ने धारणा राखेका छन् । रूपान्तरण भए पनि पार्टीको विचार, इतिहास र संगठनात्मक अनुशासन कमजोर हुन नहुने एमालेको निष्कर्ष छ ।