दसैंको टीका कात्तिक ४ गते, बिहान १०ः२६ बजे उत्तम साइत

काठमाडौं । यस वर्षको बडादसैंको टीका कात्तिक ४ गते बुधबार बिहान १० बजेर २६ मिनेटमा लगाउन उत्तम साइत रहेको छ ।

नेपाल पञ्चाङ्ग निर्णायक विकास समितिले विजया दशमीका दिन टीका लगाउने उत्तम समय बिहान १०ः२६ बजे निर्धारण गरेको हो । समितिका अनुसार विजया दशमीकै दिन बिहान ८ः४९ बजे देवी विसर्जनको साइत रहेको छ । टीका लगाउँदा टीका लगाउने र लगाइमाग्ने दुवै पश्चिम मोहडा फर्किनुपर्ने जनाइएको छ ।

यस वर्ष असोज २५ गते आइतबारबाट नवरात्र सुरु हुनेछ । सोही दिन घटस्थापना गरिनेछ । घटस्थापनाको शुभसाइत बिहान ११ः४७ बजे तोकिएको छ । चित्रा नक्षत्र र वैधृति योगसमेत परेकाले घटस्थापनाअघि चित्रा नक्षत्र र वैधृति योगको शान्ति गरेर घटस्थापना गर्नु शास्त्रसम्मत हुने समितिले जनाएको छ ।

असोज २६ गते सोमबार बिहान १०ः०७ बजे झण्डा फेर्ने शुभसाइत रहेको छ । झण्डा फेर्दा पश्चिम मोहडा फर्काउनुपर्नेछ ।

असोज २९ गते बिहीबार श्रीपचलीभैरव यात्रा हुनेछ । असोज ३१ गते शनिबार फूलपाती परेको छ । फूलपातीका दिन श्री तुलजाभवानी यात्राको शुभसाइत बिहान ७ः३७ बजे र स्थिरासनको शुभसाइत बिहान १०ः३९ बजे रहेको छ ।

कार्तिक १ गते आइतबार महाष्टमी तथा कालरात्रि मनाइनेछ । कार्तिक २ गते अष्टमी परेको छ । त्यसपछि कार्तिक ३ गते मंगलबार महानवमी परेको छ ।

कार्तिक ४ गते विजया दशमीका अवसरमा देवी विसर्जन, टीका तथा जमरा ग्रहण गरिनेछ । सोही दिन श्री तुलजाभवानी यात्राको शुभसाइत बिहान १०ः५१ बजे र स्थिरासनको शुभसाइत दिवा ११ः५२ बजे रहेको छ । खड्गयात्रा पनि सोही दिन हुनेछ ।

दसैंका अन्य महत्वपूर्ण विधिअन्तर्गत कार्तिक ८ गते आइतबार अखिलबलिपूर्ति तथा कोजाग्रत पूजा गरिने समितिले जनाएको छ । कोजाग्रत पूर्णिमासँगै दसैं सकिने छ ।