नेपाल प्रेसको कार्यालयबाट पत्रकार विश्वमणि सुवेदी पक्राउ

काठमाडौं । प्रहरीले नेपाल प्रेसको कार्यालयभित्रै प्रवेश गरेर पत्रकार विश्वमणि सुवेदीलाई पक्राउ गरेको छ ।

सुरक्षा तथा अपराध बिटमा रिपोर्टिङ गर्दै आएका सुवेदी समाचार कक्षमा कार्यरत रहेकै बेला सादा पोशाकमा आएका तीन प्रहरीले उनलाई नियन्त्रणमा लिएका हुन् ।

प्रहरीको भ्यानमा आएका उनीहरूले गेटमा रहेका सुरक्षागार्डलाई साथी भेट्न आएको बताएका थिए । त्यसपछि समाचार कक्षमा प्रवेश गरी समाचारको विषयमा छलफल गर्नुपर्ने भन्दै सुवेदीलाई आफूसँग जान आग्रह गरेका थिए ।

समाचार कक्षमा रहेका पत्रकार राजाराम न्यौपानेका अनुसार प्रहरीले पक्राउ पुर्जी देखाएका थिएनन् । आफूहरू अपराध अनुसन्धानबाट आएको र ‘आईजी साब’को आदेश रहेको मात्र बताएका थिए ।

सुवेदीले छलफलका लागि जानुपर्ने भए आफ्नै मोटरसाइकलमा जाने बताए पनि प्रहरीले अनुमति नदिई उनलाई प्रहरीको गाडीमा राखेर लगेका थिए । नेपाल प्रेसले सुवेदीसँग सम्पर्क गर्न खोज्दा उनको फोन नउठेको उल्लेख गरेको छ । प्रहरीले पनि पक्राउबारे आधिकारिक जानकारी दिएको छैन ।

प्रहरी स्रोतका अनुसार साइबर ब्युरोको आग्रहमा अपराध महाशाखाले सुवेदीलाई नियन्त्रणमा लिएको हो। नेपाल प्रेसमा प्रकाशित प्रहरी महानिरीक्षकमाथि राजीनामाको दबाबसम्बन्धी समाचारको स्रोत खोज्ने क्रममा उनलाई पक्राउ गरिएको स्रोतको दाबी छ।