आईजीपी हटाउने निर्णयमाथि प्रश्न : ‘सरकार कसको निर्देशनमा चलिरहेको छ ?’

काठमाडौं । नेपाली कांग्रेस संसदीय दलका नेता भीष्मराज आङदेम्बेले प्रहरी महानिरीक्षक (आईजीपी) दानबहादुर कार्कीलाई कार्यकाल बाँकी छँदै पदबाट हटाइएको विषयमा सरकारसँग जवाफ मागेका छन् । उनले देशका नागरिक विभिन्न समस्याबाट गुज्रिरहेका बेला सरकारको प्राथमिकता प्रहरी प्रमुख परिवर्तनमा केन्द्रित भएको भन्दै निर्णयको औचित्यमाथि प्रश्न उठाएका हुन् ।

सामाजिक सञ्जालमार्फत आफ्नो धारणा सार्वजनिक गर्दै आङदेम्बेले आईजीपीको कार्यकाल अझै १७ महिना बाँकी हुँदाहुँदै हटाउनुपर्ने बाध्यता के थियो भन्ने प्रश्न गरेका छन् । ‘के अहिले देशको राष्ट्रिय आवश्यकता नै आईजीपी परिवर्तन गर्नु हो ?’ उनले प्रश्न गरेका छन् ।

उनले भोटेकोशी र बूढीगण्डकी क्षेत्रमा आएको बाढीबाट प्रभावित नागरिकको पीडा, विस्थापित सुकुम्बासीको अवस्था र बढ्दो महँगीलाई सरकारका सामुन्ने रहेका प्रमुख चुनौतीका रूपमा उल्लेख गरेका छन् । देश गम्भीर संकटतर्फ जाँदै गर्दा सरकारले प्रहरी प्रमुख हटाउने विषयलाई प्राथमिकता दिएको उनको आरोप छ ।

आङदेम्बेले आईजीपी हटाउनुको आधार र प्रमाण सार्वजनिक गर्न पनि सरकारसँग माग गरेका छन् । सरकारका प्रवक्ताले पार्टीको निर्देशनमा आईजीपी हटाइएको बताएको तर राष्ट्रिय स्वतन्त्र पार्टीका प्रवक्ताले भने पार्टीको निर्देशन नभएको बताएको उल्लेख गर्दै उनले सरकार कसको निर्देशनमा चलिरहेको छ भन्ने प्रश्न गरेका छन् ।

उनले अनुसन्धानका लागि प्रहरीले बरामद गरेको एक बिचौलियाको मोबाइल प्रधानमन्त्रीका प्रमुख राजनीतिक सल्लाहकारको घरमा पुगेको विषयलाई पनि गम्भीर रूपमा उठाएका छन् । अनुसन्धानका लागि बरामद गरिएको मोबाइल त्यहाँ किन पुग्यो र त्यसमा रहेको के मेटाउन खोजिएको थियो भन्ने प्रश्न गर्दै उनले घटनाबारे स्पष्ट पार्नुपर्ने बताएका छन् ।

जनताले सुशासन कायम गर्ने, भ्रष्टाचार अन्त्य गर्ने र जीवनस्तर सुधार्ने अपेक्षासहित वर्तमान सरकारलाई मत दिएको उल्लेख गर्दै आङदेम्बेले सत्ता र शक्तिको दुरुपयोग गर्न वा प्रहरी प्रशासनलाई नियन्त्रणमा राख्न जनमत प्राप्त नभएको टिप्पणी गरेका छन् ।

‘अनेक तानाबाना र षड्यन्त्रको जालो बुनेर आईजीपी हटाउनु गलत छ । यो सुशासन होइन, शक्ति प्रदर्शन हो,’ उनले लेखेका छन् ।