
सुनसरी । लागुऔषध ब्राउन सुगर (खैरो हेरोइन)सहित सुनसरीको लौकहीबाट दुई युवक पक्राउ परेका छन् । पक्राउ पर्नेमा इटहरी उपमहानगरपालिका–७ का २२ वर्षीय विज्ञान विष्ट र २६ वर्षीय उपेन्द्र चौधरी रहेका छन् ।
इलाका प्रहरी कार्यालय लौकहीबाट खटिएको टोलीले सोमबार दिउँसो ३ः३० बजे कोशी गाउँपालिका–१ स्थित लौकही पूर्व बसस्टेन्डमा शंका लागेर चेकजाँच गर्दा उनीहरूको साथबाट ब्राउन सुगर १ ग्राम ७७० मिलिग्राम फेला पारेको हो । प्रहरीका अनुसार विष्टको साथबाट ५६० मिलिग्राम र चौधरीको साथबाट १ ग्राम २१० मिलिग्राम पदार्थ बरामद भएको छ ।
दुवैलाई नियन्त्रणमा लिएर जिल्ला प्रहरी कार्यालय सुनसरीमा राखिएको छ । लागुऔषध ऐनअन्तर्गतको मुद्दा चलाउन थप अनुसन्धान भइरहेको प्रहरीले जनाएको छ ।



















