
किमाथांका (संखुवासभा) । संखुवासभाको किमाथांका भन्सार कार्यालयमा ९ जना कर्मचारीको दरबन्दी छ । तर, उक्त कार्यालयमा कर्मचारी नै छैनन् ।
भन्सार कार्यालय एक जना कार्यालय सहयोगीको भरमा चलिरहेको छ । भन्सार कार्यालयमा कर्मचारीविहीन हुँदा संखुवासभाको उत्तरी भोट खोलावासीले सास्ती खेपिरहेका छन् ।
किमाथाांका भन्सार कार्यालय गत कात्तिक ७ गतेदेखि एक जना कार्यालय सहयोगीको भरमा छाडिएको छ । भन्सार कार्यालयका प्रमुख बलबहादुर श्रेष्ठको भैरहवा भन्सार कार्यालयमा सरुवा भएपछि उक्त कार्यालय कार्यालय सहयोगीले थेगिरहेका छन् ।
उत्तरी क्षेत्र किमाथाांकामा विक्रम संवत २०३५ सालमा भन्सार कार्यालय स्थापना भएको थियो । द्वन्द्वका कारण भोटखोलाको हटियामा रहेको सीमा भन्सार २०५७ देखि सदरमुकाम खाँदबारीमा रहेको छ ।
भन्सार कार्यालय अहिले कोष तथा लेखा नियन्त्रकको कार्यालय भवनमा राखिएको छ । उता किमाथाांका सीमा भन्सार कार्यालय करिब २३ वर्षदेखि सदरमुकाम खाँदबारीमै रहेका कारण सेवाग्राहीले सास्ती पाइरहेका छन् ।
किमाथाांका सीमा भन्सारको कामका लागि तीन–चार दिनको पैदल यात्रा तय गरेर सेवाग्राहीले राजस्व बुझाउन खाँदबारी आउनुपर्ने बाध्यता छ । भन्सार कार्यालय सदरमुकाममै भएपछि सेवा झन्झटिलो भएको हो ।
उत्तरी क्षेत्र किमाथाांका नाका गत जेठ १२ गते सञ्चालनमा आए पनि भन्सार कार्यालय नहुँदा भोट खोलावासीले सास्ती पाएका छन् । भन्सार कार्यालयले गत वर्ष ७५ हजार ५ सय ५७ रूपैयाँ राजस्व संकलन गरेको थियो । जेठ १२ गतेबाट चीनसँगको नाका सञ्चालनमा आएपछि किमाथाांका भन्सार कार्यालयले एक लाख ८० हजार रुपैयाँ राजस्व संकलन गरेको छ ।
किमाथाांका नाकाबाट खाद्यान्न, दैनिक उपभोग्य वस्तु, लत्ताकपडा, इलोक्ट्रोनिक, जुडिबुटीलगायत सामान आयात–निर्यात गर्दा तीन–चार दिन पैदल हिँडेर सरदरमुकाम खाँदबारी आउनुपर्ने बाध्यता छ । उत्तरी भोटखोलाका बासिन्दा सीमापारि चीनको चाँगा, देन्दाङलगायतका बजारमा सिमापासका आधारमा चिनियाँ बजारमार्फत खाद्यान्नदेखि दैनिक उपभोग्य सामान आयात गर्दै आएका छन् ।
किमाथाांका सीमा भन्सार नाकामा ८० प्रतिशतभन्दा बढी चौरीको पुच्छर आयात हुने गरेको छ । खाँदबारीदेखि किमाथाांकाको दूरी एक सय ६२ किलो मिटर छ । रासस

























