
ललितपुर । ललितपुर जिल्ला ब्याडमिन्टन संघको आयोजना तथा बालकुमारी रिमिक्स क्लबको सहआयोजनामा हुने तेस्रो संस्करणको ललितपुर मेयर कप ब्याडमिन्टन प्रतियोगिता भोलि (मंगलबार)देखि सुरु हुँदैछ ।
४ दिनसम्म सञ्चालन हुने प्रतियोगितामा पुरुष एकल, महिला एकल, पुरुष युगल (शीर्ष २० बरियता बाहेक), यू–१७ ब्वाईज र गल्र्स तथा मास्टर ४५ माथि युगल गरी ६ विधामा प्रतिस्पर्धा हुने आयोजकले जनाएको छ ।
नेपाल ब्याडमिन्टन संघको प्राविधिक सहयोगमा हुने प्रतियोगितामा पुरुष एकल र महिला एकलका खेलाडीहरुले खेलको आधारमा बरियता अंक प्राप्त गर्नेछन् ।
सहआयोजक बालकुमारी रिमिक्स क्लबको आफ्नै कभर्डहलमा खेल हुनेछ । ३१ लाखको अनुमानित लागत रहेको प्रतियोगितामा पुरुष तथा महिला एकल र पुरुष युगलतर्फका विजयी खेलाडीले नगद ४० हजारका साथ मेडल, ट्रफी र प्रमाणपत्र प्राप्त गर्ने छन् ।
यस्तै दोस्रो हुनेले नगद २० हजार र तेस्रो स्थान प्राप्त गर्नेले नगद १० हजारका साथ मेडल, ट्रफी र प्रमाणपत्र प्राप्त गर्नेछन् ।
यू–१७ तर्फ ब्वाईज तथा गल्र्स एकलमा प्रथम, द्वितीय र तृतीय हुनेले नगद २० हजार, १० हजार र ५ हजारका साथ मेडल, ट्रफी र प्रमाणपत्र तथा मास्टर ४५ माथिका प्रथम, द्वितीय र तृतीय हुनेले नगद ३० हजार, १५ हजार र ७ हजार ५ सयसहित मेडल, प्रमाणपत्र र ट्रफी प्राप्त गर्नेछन् ।
प्रतियोगितामा नेपालभरिबाट र ३ विभागिय टोली गरी २ सय २० खेलाडीहरुले ६ विधामा प्रतिस्पर्धा गर्ने म्याच कन्ट्रोल सुमित शाक्यले जानकारी दिए ।



















