ताप्लेजुङमा चालक कुटपिट र सवारी तोडफोडको विरोधमा यातायात बन्द

ताप्लेजुङ । सवारी चालकलाई निर्घात कुटपिट गरेको विरोधमा ताप्लेजुङ पाथीभरा यातायात सेवा प्रा.लिले आज (शुक्रबार)बाट अनिश्चितकालिन यातायात बन्दको आवह्वान गरेकाे छ । व्यवसायीले मेची राजमार्ग, तमोर करिडोर र तेह्रथुमबाट ताप्लेजुङ छिर्ने नाका र ताप्लेजुङका शाखा सडकमा यातायात बन्दको आवह्वान गरेका हुन् ।

प्रहरी र ‘नो केबलकार’ पक्षबीच बिहीबार झडप भएकाे थियाे । झडपमा घाइते भएकाहरुको उद्धार तथा उपचारको सहजीकरणका लागि फुङलिङबाट पाथीभरा केवलकारको निर्माणाधीन ‘बेस स्टेशन’तर्फ गएको अधिकारकर्मी, व्यवसायी र रेडक्रसकर्मी चढेको सवारी ‘नो केबलकार’ पक्षका कार्यकर्ताले तोडफोड गरी चालकलाई कुटपिट गरेको विरोधमा यातायात बन्दको घोषणा भएको हो ।

‘नो केबलकार’ समूहले आक्रमण गर्दा मे १ ज २५७९ नम्बरको सवारीका चालक ४३ वर्षीय राजकुमार पौडेल घाइते भएका थिए । उनलाई कुटपिट गरेको विरोधमा पाथीभरा यातायात सेवा प्रा.लिले बन्द आह्वान गरेको हो । यातायात व्यवसायीले तोडफोड र कुटपिटमा संलग्नलाई कारबाही गर्नुपर्ने, घाइतेको उपचार र तोडफोड गरिएको सवारीसाधन मर्मत हुनुपर्ने माग गरेका छन् ।

मुक्कुमलुङ पदयात्राको अन्तिम दिन बिहीबार ‘नो केवलकार’ पक्षधरले निर्माणाधीन ‘बेस स्टेशन’तर्फ अघि बढेर सुरक्षाकर्मीमाथि आक्रमण गर्न थालेपछि भएको झडपमा १३ जना घाइते भएका थिए । घाइतेको उद्धारका लागि फुङलिङबाट गएको रेडक्रस सभापति इन्द्रबहादुर गुरुङ, ताप्लेजुङ उद्योग वाणिज्य संघका महासचिव कमल लिम्बू र इन्सेक प्रतिनिधि एलिना दियाली चढेको सवारी आन्दोलनरत पक्षले तोडफोड गरी चालक राजकुमार पौडेललाई निर्घात कुटपिट गरिएको थियो ।