
इलाम । इलाममा पुल निर्माणमा खटिएका कामदार सुतेकै ठाउँमा मृत फेला परेका छन् ।
उदयपुर घर भएका २४ वर्षीय सविन खड्का सुतेकै ठाउँमा मृत भेटिएका हुन् । उनी रोङ गाउँपालिका– ३ काजीटारमा पुल निर्माणमा खटिएका कामदार हुन् । उनी पुल निर्माणस्थल नजिकै बनाइएको कटेरामा सुतेका थिए ।
कटेरोमा बसेर खड्काले शनिबार मादक पदार्थ सेवन (मापसे) गरेको पाइएको प्रहरीले जनाएको छ । प्रहरीका अनुसार साथी नेपालसिंह कुरुम्बाङले बोलाउँदा नबोलेपछि बाहिर निस्केर हेर्दा कटेरोको ढोका अगाडि खड्का मृत फेला परेका हुन् ।
उनको मृत्युको कारण खुलेको छैन । प्रहरीले घटनाको अनुसन्धान सुरु गरेको छ ।

























