
काठमाडौं । काठमाडौंमा आज (शुक्रबार) बिहानका राति टिपरले किचेर २ बालक र १ वृद्ध गरेर ३ जनाको मृत्यु भएको छ ।
शंकरापुर नगरपालिका–६ सलम्बुटारस्थित बेवारिसे बालबालिकाहरुको आश्रयस्थलमा टिपर छिर्दा दुर्घटना भएको हो । द्वन्द्वपीडित तथा अपांग समाज नेपाल (सीभीडीएस)ले सञ्चालन गरेको आश्रयस्थलको टहरामा बिहानका राति ३ बजेतिर बा २ क ६५८० नम्बरको टिपर छिरेको थियो ।
आश्रयस्थलका फाउण्डर अध्यक्ष युवराज थापाका अनुसार टिपरले किचेर २ बालकको घटनास्थलमै मृत्यु भयो । १ जना वृद्धको उपचारका क्रममा मृत्यु भएको उनले बताए ।
टिपर चालक सिन्धुपाल्चोकका २५ वर्षीय सागर माझीलाई प्रहरीले नियन्त्रणमा लिएर अनुसन्धान सुरु गरेको छ । द्वन्द्वपीडित तथा अपांग समाज नेपाल (सीभीडीएस)ले सलम्बुटारमा २०६२ सालदेखि आश्रयस्थल सञ्चालन गर्दै आएको थियो ।
आश्रयस्थलमा अहिले ६१ जनालाई राखिएके छ । तीमध्ये १० जना बसेको टहरामा टिपर छिरेको प्रहरीले जनाएको छ ।

























