
विराटनगर । झडपका कारण अशान्त बनेको विराटनगरको बाल सुधारगृहबाट आइतबार १४ जनाको स्थानान्तरण भएको छ ।
विराटनगरस्थित बाल सुधारगृहका प्रमुख मिलन चौहानले स्थानान्तरण गरेर १४ जनालाई बाँकेको नौवस्तामा रहेको बाल सुधारगृहमा पठाइएको जानकारी दिए । उनका अनुसार बाँकेको बाल सुधारगृहमा १८ वर्ष माथिकालाई राखिन्छ । विराटनगरबाट पठाइएका सबै १८ वर्षमाथिका रहेको चौहानले बताए ।
उनका अनुसार स्थानान्तरण गरिएकाहरु कर्तव्य ज्यान, जबरजस्ती करणी र लागुऔषध मुद्दामा अदालतबाट दोषी ठहर भएकाहरु हुन् । ‘सुधारगृहभित्र विवाद, झगडा र झडपमा संलग्न भएकाहरुलाई स्थानान्तरण गरिएको हो,’ चौहान भन्छन्, ‘कतिपयलाई सुरक्षाका दृष्टिकोणले पनि पठाउनुपर्ने अवस्था आयो ।’
विराटनगर महानगरपालिका–३ स्थित सुधारगृहभित्र गत शुक्रबार साँझ दोहोरो झडप हुँदा ३ जना घाइते भएका थिए । घाइते सबै २२ वर्षका थिए । २ जना पाँचथर र १ जना सुनसरीका हुन् । उपचारपछि डिस्चार्ज भइसकेका घाइतेहरुलाई पनि स्थानान्तरण गरिएको जानकारी चौहानले दिए ।
उनका अनुसार सुधारगृहभित्र ठूलाले सानालाई हेप्ने, बारम्बार विवाद र झगडा गर्ने समस्या थियो । १४ जनालाई स्थानान्तरण गरिसकेपछि तत्काललाई त्यो समस्या हल भएको उनले बताए । स्थानान्तरणका लागि बाल सुधारगृहले जिल्ला प्रशासन कार्यालय मोरङलाई सिफारिस गरेको थियो । सिफारिसका आधारमा प्रशासनले कारागार व्यवस्थापन विभागसँग अनुमति लिएर स्थानान्तरणको प्रक्रिया पूरा गरेको हो ।
कानुनी विवादमा परेका १८ वर्षमुनिका बालकलाई अदालतको फैसला र आदेश अनुसार सुधारगृहमा राखिन्छ । तर, सुधारगृहमा राखिएका बालक अहिले युवा भइसकेका छन् । युवा भइसकेकाहरुबीच झडप भएको हो । सुधारगृहमा भएको झडपको प्रहरीले अनुसन्धान गरिरहेको छ ।
सुधारगृहको क्षमता ५० जनाको हो । तर, २ सय ४८ जनालाई राखिएको थियो । १४ जनाको स्थानान्तरण भएपछि आइतबार २ सय ३४ जना छन् । तीमध्ये १८ वर्षमाथिका १ सय ८ जना रहेको सुधारगृहका प्रमुख चौहानले बताए ।
उनका अनुसार सुधारगृहभित्र रहेकामध्ये १८ वर्ष कटेर बालिग भएकाहरुको संख्या धेरै छ । उनीहरु बालक हुँदै कानुनी विवादमा परेर सजाय भुक्तान गरिरहेका छन् । तर, आवश्यक कानुनको अभावले बालिग भइसके पनि अरु बालकसँगै सुधारगृहमा राख्ने गरिन्छ । ‘युवा अवस्थामा पुगेकालाई बालकहरुसँगै राखिएको छ । क्षमताभन्दा धेरै छन् । सुधारगृहभित्रको अवस्था समस्याग्रस्त छ,’ चौहान भन्छन् ।
सुधारगृहको सुरक्षाका लागि नेपाल प्रहरीका सहायक निरीक्षक (असइ)को नेतृत्वमा प्रहरी परिचालन गरिएको छ । मोरङका प्रमुख जिल्ला अधिकारी इन्द्रदेव यादवले झडपका कारण अशान्त भएको सुधारगृहको अवस्था सामान्य भइसकेको बताए । ‘केहीलाई स्थानान्तरण गरिसकिएको छ । सुधारगृहको सुरक्षा व्यवस्था कडा पारिएको छ । अहिले अवस्था सामान्य भइसक्यो,’ यादवले भने ।

























