
काठमाडौं । कतारमा १८ जना नेपालीले आममाफी पाएका छन् । आममाफी पाएसँगै उनीहरुको जीवन जोगिएको छ ।
विभिन्न अपराधमा जेल जीवन बिताइरहेकाले आममाफी पाएका हुन् । कतार सरकारले रमजान र ईद पर्वको अवसरमा आममाफी दिने निर्णय गरेको परराष्ट्र मन्त्रालयले जनाएको छ ।
परराष्ट्र मन्त्रालयले विज्ञप्ति जारी गर्दै कतार सरकारप्रति आभार प्रकट गरेको छ । नेपाल र कतारबीचको द्विपक्षीय सम्बन्ध र मानवीयताका आधारमा कतारले गरेको क्षमादानलाई उच्च मूल्यांकन गर्ने परराष्ट्र मन्त्रालयले विज्ञप्तिमा उल्लेख गरेको छ ।
सरकारले कतारको दोहास्थित नेपाली दूतावासमार्फत कतार सरकारलाई उनीहरूको रिहाइका लागि आग्रह गरेको थियो। आममाफी पाउने नेपालीहरूको विवरण सार्वजनिक गरिएको छैन ।

























