
काठमाडौं । प्रधानमन्त्री केपी शर्मा ओली पहिलोपटक नेकपा एकीकृत समाजवादीको पार्टी कार्यालयमा पुगेका छन् । आइतबार दिवंगत भएका नेकपा एस सम्वद्ध वरिष्ठ पत्रकार तथा लेखक कमल कोइरालालाई अन्तिम श्रद्धाञ्जलीका लागि प्रधानमन्त्री ओली आलोकनगरस्थित नेकपा एसको कार्यालय पुगेका हुन् । उनले चैत १५ गते राजावादीले कायालयमा गरेको क्षतिको अवलोकन पनि गरे ।
प्रधानमन्त्री ओली पुग्दा नेकपा एसका अध्यक्ष माधव कुमार नेपाल, महासचिव घनश्याम भुसाल, पूर्वएमाले नेता भीम रावललगायतका नेताहरू थिए । प्रधानमन्त्री ओलीले नेताहरुसँग केही समय भलाकुसारी पनि गरे ।
नेकपा एमालेबाट विभाजित भएर २०७८ भदौ २ गते नेकपा एस दर्ता भएको थियो । सुरुमा नेकपा एकिकृत समाजवादी पार्टीको अस्तित्व स्विकार गर्न नमानेका ओली लेखक कोइरालाको श्रद्धान्जलीका लागि पुगे ।ओलीको आलोकनगर प्रवेशसँगै दुई दलबीच सम्बन्ध सुधारको अपेक्षा गरिएको छ ।


























