
काठमाडौं । समग्र अर्थतन्त्र बुझेको व्यक्तिलाई गभर्नर बनाउन उद्योग संगठन मोरङले सरकारसँग माग गरेको छ । अर्थतन्त्रको विकास र उद्योग व्यवसाय क्षेत्रको विकासको गती तीव्र बनाउनका लागि नीतिगत सुधार गर्न आवश्यक रहेकाले सक्षम गभर्नर बनाउन माग गरेको हो ।
बुधबार संगठन अध्यक्ष राकेश सुरानाले विज्ञप्ति जारी गर्दै अर्थतन्त्र र उद्योग–व्यवसाय क्षेत्रमा छाएको निराशा मध्यनजर गरी आर्थिक र वित्तीय क्षेत्रको गहिरो ज्ञान भएको व्यक्तिलाई गभर्नर बनाउन आग्रह गरेका हुन् ।
‘देशको मौद्रिक नीति, मुद्रास्फीति नियन्त्रण, ब्याजदर निर्धारण, वित्तीय स्थिरताजस्ता विषयले औद्योगिक र आर्थिक क्षेत्र सञ्चालनमा महत्त्वपूर्ण भूमिका निर्वाह गर्ने भएकाले व्यावहारिक अनुभव र बुझाइ भएका व्यक्तिलाई गभर्नर नियुक्ति गर्नुपर्छ,’ संगठनले भनेको छ ।

























