
काठमाडौँ । नेपाल बार एसोसिएसनको चुनावको मतगणना आज (सोमबार) देखि सुरु हुने भएको छ । नेतृत्व चयनका लागि शनिबार मतदान भएको थियो ।
देशभरका ३५ मतदान केन्द्रमा भएको मतपेटिकाहरू काठमाडौँ आइपुगेसँगै सोमबार दिउँसोबाट मतगणना थालिने निर्वाचन समितिले जनाएको छ ।
निर्वाचनमा देशभरका ९ हजार ९९७ मतदाताहरुमध्ये ७ हजार ९९५ मत खसेको थियो ।
नेपाल बारको २७ औ महाधिवेशनमा अध्यक्षका लागि प्राध्यापक विजय मिश्र र वरिष्ठ अधिवक्ता रमनकुमार श्रेष्ठ प्रतिस्पर्धामा छन् ।
यसपटक बारको चुनावमा प्रतिस्पर्धी मानिएका कांग्रेस निकट वकिलहरूको संगठन डिएलएले र एमाले निकट वकिलहरूको संगठन पीपीएले गठबन्धन गरेर चुनावमा गएका हुन् । उनीहरुले साझा उम्मेदवारका रुपमा अध्यक्षमा मिश्र र महासचिवमा केदार कोइरालालाई अघि सारेका थिए ।
त्यस्तै, माओवादी केन्द्र निकट कानुन व्यवसायी र एकीकृत समाजवादी रासोपा सहितका दल निकटका वकिलहरूको उम्मेदवारका रुपमा श्रेष्ठ मैदानमा छन् ।

























