
काठमाडौं । राष्ट्रिय स्वतन्त्र पार्टीका सभापति एवं गोर्खा मिडिया नेटवर्कका तत्कालीन प्रबन्ध निर्देशक रवि लामिछानेलाई आज सोमबार रुपन्देही जिल्ला अदालतमा पेस गरिँदैछ ।
अदालत लैजानुअघि रुपन्देही सदरमुकाम भैरहवाको सुरक्षा व्यवस्था कडा बनाइएको छ । जिल्ला प्रहरीबाट अदालत जाने बाटो र अदालत परिसर आसपास नेपाल प्रहरी र सशस्त्र प्रहरी तैनाथ छन् ।
जिल्ला प्रहरी प्रवक्ता डीएसपी सुरज कार्कीले उच्च अदालतबाट मिसिल प्राप्त हुनेबित्तिकै लामिछानेलाई जिल्ला अदालतमा पेश गरिने जनाएका छन् । अदालतमा पेश गरेपछि उनलाई आजै कारागार पठाउने सम्भावना रहेको जनाइएको छ ।
शुक्रबार राति काठमाडौंमा पक्राउ परेका उनलाई शनिबार बिहान भैरहवा पुर्याइएको थियो । दुई दिन बिदा भएपछि उनलाई जिल्ला प्रहरी कार्यालय, रुपन्देहीको हिरासतमा राखिएको थियो ।
बुटवलको सुप्रिम सहकारी ठगी र संगठित अपराधसम्बन्धी मुद्दामा उच्च अदालत तुलसीपुर बुटवल इजलासले शुक्रबार थुनामा राख्न आदेश दिएपछि प्रहरीले लामिछानेलाई पक्राउ गरेको थियो ।

























