विराटनगरमा बजेट तयारी छलफल : नीतिगत सुधारमा निजी क्षेत्रको जोड

Share this
733shares
मुलुकी खबर
मुलुकी खबर
clock२०८१ चैत २५, सोमबार १९:३०

विराटनगर । आगामी आर्थिक वर्ष २०८२–०८३ को बजेटमा स्वदेशी बजारलाई चलयमान बनाउनका लागि नीतिगत सुधार गर्न निजी क्षेत्रले सुझाव दिएको छ । अर्थ मन्त्रालयले विराटनगरमा गरेको कार्यक्रममा निजी क्षेत्रले नीतिगत सुधारका लागि आग्रह गरेको हो ।

विराटनगरमा सोमबार आर्थिक वर्ष २०८२–०८३ को आर्थिक ऐन तर्जुमाका लागि भन्सार महसुल, मूल्य अभिवृद्धि कर, आयकर, अन्तशुल्क, गैरकर एवं राजस्व चुहावट र राजस्व प्रशासनमा गर्नुपर्ने सुधारका विषयमा सुझाव संकलन तथा अन्तरक्रिया कार्यक्रम मन्त्रालयले आयोजना गरेको छ । कार्यक्रममा मन्त्रालयका अधिकारीसहित विराटनगरका उद्योगी व्यवसायीको सहभागिता रहेको थियो ।

मोरङ उद्योग व्यापार संघका अध्यक्ष अनुपम राठीले स्वदेशी बजार सुक्दै जाने र सीमावर्ती क्षेत्रका भारतीय बजारमा चहलपहल बढ्दै जाने अवस्था रहेको बताए । सरकारी नीतिकै कारण उपभोक्ता भारतीय बजारसम्म पुग्ने गरेको उनको भनाइ छ । भारतबाट अवैध रुपमा भइरहेको आयात रोक्न पनि उनको माग छ ।

‘चिनी नेपालमा माग अनुसार उत्पादन भएको छैन । तर, बजारमा पर्याप्त छ । यो आपूर्ति चोरीको बाटोबाट भएको हो । चोरी पैठारी रोक्न राज्यले ध्यान दिनुपर्छ,’ राठीले भने । उनले चिनीको भन्सार १५ प्रतिशत बनाउन माग गरे ।

अहिले ३० प्रतिशत छ । लत्ताकपडाको भन्सारलाई पनि व्यवस्थित गर्न उनको सुझाव छ । ‘भन्सार मूल्यांकन ६ सय रूपैयाँ मात्रै छ । तर, कपडा २ सयदेखि २ हजारसम्मको छ । भन्सार मूल्यांकनलाई परिमार्जन गर्नुपर्छ । औद्योगीकरण बढाउनका लागि राज्यले ध्यान दिनुपर्छ,’ राठी भन्छन् ।

उनले सबै वस्तुमा १३ प्रतिशत मूल्य अभिवृद्धि कर रहेका कारण उपभोक्ता मारमा परेको उल्लेख गर्दै अत्यावश्यक वस्तुमा ०.५, सामान्य वस्तुमा १३ र विलासी वस्तुमा १८–२० प्रतिशत मूल्य अभिवृद्धि कर लगाउन आग्रह गरे ।

प्रतिव्यक्ति आय करमा छुटलाई बढाउन राठीको माग छ । सरकारले व्यक्तिलाई वार्षिक ५ लाख र दम्पतीलाई ६ लाखमा आयकर छुट दिएको छ । नयाँ बजेटमा व्यक्तिका लागि १० लाख र दम्पतीका लागि १२ लाखसम्म छुट दिने व्यवस्था गर्न अध्यक्ष राठीले आग्रह गरे । भारतले पनि १२ लाखसम्म आयकर छुट दिएको छ ।

नेपाल उद्योग परिसंघ कोशी प्रदेश अध्यक्ष पवनकुमार सारडाले सरकारकै गलत कर नीतिका कारण निजी क्षेत्रले समस्या भोगिरहेको बताए । उनले अहिले नेपालका ३ तहकै सरकारले कर लगाइरहेको गुनासो गरे । राज्यको नीतिकै कारण उद्योगको उत्पादन घट्दो रहेको उल्लेख गरे । ‘अहिले उद्योगको उत्पादन ५० प्रतिशतसम्म घटेको छ । कन्जुरमर छैनन् । निजी क्षेत्र पनि पलायन हुने स्थिति छ,’ सारडाले भने ।

उद्योग संगठन मोरङका अध्यक्ष राकेश सुरानाले राज्यले निजी क्षेत्रलाई धोका दिइरहेको बताए । राज्यले दिन्छु भनेको सुविधा पनि नदिएको बताउँदै उनले सरकारले नै कुनै उद्योगलाई काखा र कुनैलाई पाखा गरिरहेको गुनासो पोखे ।

सबै क्षेत्रलाई समेट्ने गरी बजेट तर्जुमा गर्न उनले आग्रह गरे । उनले नेपालमा काम गरिरहेका भारतीयलाई पनि करको दायरामा ल्याउन आग्रह गरे । भारतीय श्रमिकलाई स्थायी लेखा नम्बर दिएर करको दायरामा ल्याउनुपर्ने सुरानाको सुझाव छ ।

नेपाल उद्योग वाणिज्य महासंघ कोशी प्रदेश समितिको राजश्व परामर्श समितिका सभापति देवकिनन्दन अग्रवालले उद्योग मैत्री कर नीति बनाउन आग्रह गरे । उनले अवैध आयातलाई रोक्ने नीति आवश्यक रहेकोमा जोड दिए ।

आगामी वर्षका लागि भन्सार महसुल, मूल्य अभिवृद्धि कर, आय कर, अन्तशुल्क कर, गैरकर एवं राजश्व चुहावट र राजश्व प्रशासनमा गर्नुपर्ने सुधारको विषयमा निजी क्षेत्रले सुझाव दिएको थियो ।

नेपाल सरकार अर्थ मन्त्रालयका सह–सचिव उत्तरकुमार खत्रीले आर्थिक वर्ष २०८१–०८२ को बजेटमा रहेको त्रुटिलाई सच्याएर आगामी आर्थिक वर्ष २०८२–०८३ को नीति तथा कार्यक्रम ल्याइने बताए । निजी क्षेत्रले दिएको सुझावलाई समेट्ने उनको भनाइ छ ।

तपाइको प्रतिक्रिया
कार्कीको रिटमा सर्वोच्चमा प्रारम्भिक सुनुवाइ हुँदै
राष्ट्रिय आविष्कार केन्द्रबाट कम्प्युटर चोरी, सीसीटीभीमा कैद भयो घटना
पाँच स्थानीय तह भूमिसम्बन्धी समस्यामुक्त घोषणा
रुसमा सैन्य कार्गो विमान दुर्घटना, चालक दलसहित १९ जनाको मृत्यु
एनपिएलमा अनलाइन सट्टेबाजी गरेको आरोपमा भारतीय नागरिक पक्राउ  
विराटनगरलाई लजिस्टिक हब बनाउन कार्गो रेल सञ्चालनमा जोड
मोरङ र उदयपुरमा दुर्घटना : तीन जना घाइते, दुईको अवस्था गम्भीर
स्थानीय चुनावको तयारीमा एमाले, बुधबारदेखि राष्ट्रिय भेला
विराटनगरमा कराँते छनोटका क्रममा खेलाडी घाइते
डिकवेलाको अविजित अर्धशतकमा लुम्बिनी लायन्स फाइनलमा
© 2024 Muluki Khabar. All Rights Reserved. Design & Develop By: Indesign Media Pvt. Ltd.